ന്യൂദല്‍ഹി : ചൈന ഉയര്‍ത്തുന്ന ഏത് വെല്ലുവിളിയും നേരിടാന് പൂര്‍ണ്ണ സജജരെന്ന് ഇന്ത്യന്‍ സൈന്യം. ലഡാക്ക് ഗല്‍വാനിലുണ്ടായ അടിയന്തിര സാഹചര്യങ്ങളുടെ അടിസ്ഥാനത്തില്‍ പ്രധാനമന്ത്രി നരേന്ദ്രമോദിയെ സൈന്യം അറിയിച്ചതാണ് ഇക്കാര്യം. അതിര്‍ത്തിയിലെ സ്ഥിതിഗതികള്‍ പ്രതിരോധമന്ത്രിയുടെ നേതൃത്വത്തില്‍ ഇന്ന് ദല്‍ഹിയില്‍ വീണ്ടും വിലയിരുത്തും. മൂന്ന് സൈനിക മേധാവികളും ചീഫ് ഒഫ് ഡിഫന്‍സ് സ്റ്റഫും യോഗത്തില്‍ പങ്കെടുക്കും.
കിഴക്കന്‍ ലഡാക്കില്‍ പോര്‍ വിമാനങ്ങള്‍ ഉള്‍പ്പെടെ വിന്യസിച്ചു കഴിഞ്ഞു. നിരവധി ട്രാന്‍സ്പോര്‍ട്ട് വിമാനങ്ങളും ആക്രമണ ഹെലികോപ്ടറുകളും മുന്‍നിരയിലെ താവളങ്ങളിലേക്കും എയര്‍ സ്ട്രിപ്പുകളിലേക്കും എത്തിച്ചു കൊണ്ടാണ് ഇന്ത്യന്‍ സൈന്യം എല്ലാ തയ്യാറെടുപ്പുകളും പൂര്‍ത്തിയാക്കിയത്.
ഭൂമി ശാസ്ത്രപരമായി ഇവിടെ ചൈനയേക്കാള്‍ മേല്‍ക്കോയ്മ ഇന്ത്യയ്‌ക്കാണ് എന്നതും നമുക്ക് ഗുണം ചെയ്യുമെന്നാണ് പ്രതീക്ഷിക്കുന്നത്. ഗല്‍വാന്‍ താഴ്വരയിലും സംഘര്‍ഷ പ്രദേശങ്ങളിലും സൈനികരെ എത്തിക്കാന്‍ ലേ വ്യോമത്താവളത്തിലും പരിസരങ്ങളിലും നിരവധി ചിനൂക്ക് ഹെലികോപ്റ്ററുകള്‍ ആണ് തയാറായിട്ടുള്ളത്. സൈനികരെയും സാമഗ്രികളും എത്തിക്കാന്‍ എംഐ17വി 5 ഹെലികോപ്ടറുകളും തയ്യാറായിക്കഴിഞ്ഞു.
സുഖോയ് എംകെ 1, മിറാഷ്, ജാഗ്വാര്‍ തുടങ്ങിയവയ്‌ക്ക് ഇന്ത്യന്‍ ബേസുകളില്‍ നിന്ന് സംഘര്‍ഷ മേഖലകളിലേക്ക് അതിവേഗമെത്താന്‍ സാധിക്കും. കിഴക്കന്‍ ലഡാക്കില്‍ ഇന്ത്യന്‍ കരസേനയ്‌ക്ക് വ്യോമ പിന്തുണ നല്‍കാന്‍ അമേരിക്കന്‍ അപ്പാച്ചെ ആക്രമണ ഹെലികോപ്റ്ററുകളും വിന്യസിച്ച് കഴിഞ്ഞു. ക്രമീകരണങ്ങള്‍ ഏത് സാഹചര്യവും നേരിടാന് പാകത്തില്‍ പൂര്‍ത്തിയായതായി സൈന്യം ക്രേന്ദ്രസര്‍ക്കാരിനെ അറിയിച്ചു.
പ്രതികരിക്കാൻ ഇവിടെ എഴുതുക: