വണ്ണപ്പുറം: തൊമ്മന്‍കുത്തില്‍ യുവാവിനെ കാറില്‍ തട്ടിക്കൊണ്ട് പോയി മര്‍ദിച്ചതായി കേസ്. എട്ടുപേര്‍ക്കെതിരെ പോലീസ് കേസെടുത്തു. ദര്‍ഭത്തൊട്ടി ഒഴുകയില്‍ അനീഷി (35)നാണ് മര്‍ദനമേറ്റത്. അനീഷ് തൊടുപുഴയിലെ സ്വകാര്യ ആശുപത്രിയില്‍ ചികിത്സയിലാണ്. സംഭവവുമായി ബന്ധപ്പെട്ട് കോടിക്കുളം സ്വദേശിയും ഓട്ടോ ഡ്രൈവറുമായ ജിനേഷ്, വണ്ണപ്പുറം സ്വദേശികളും ലോറി ഡ്രൈവര്‍മാരുമായ നിസാര്‍, കുട്ടന്‍ (അലുമിനിയം കുട്ടന്‍), കണ്ടാലറിയാവുന്ന അഞ്ചുപേര്‍ ഉള്‍പ്പെടെ എട്ടുപേര്‍ക്കെതിരെ പോലീസ് കേസെടുത്തു. ചൊവ്വാഴ്ച വൈകിട്ട് ആറരയോടെയായിരുന്നു സംഭവം.
സ്‌കൂട്ടറില്‍ വൈകിട്ട് വീട്ടിലേക്ക് പോകുന്നതിനിടയില്‍ ദര്‍ഭത്തൊട്ടി പച്ചില ഫാക്ടറിയ്‌ക്ക് സമീപം കാറിലെത്തിയ സംഘം അനീഷിന്റെ വാഹനം കൈ കാണിച്ച് നിര്‍ത്തി താക്കോല്‍ ഊരിയെടുത്തു. തുടര്‍ന്ന് കാറില്‍ ബലമായി പിടിച്ചുകയറ്റി കൊണ്ടുപോകുകയായിരുന്നു. അനീഷ് കാര്യം തിരക്കിയപ്പോള്‍ അനീഷിന്റെ ജേഷ്ഠന്‍മാര്‍ ജിനേഷിന് നല്‍കാനുള്ള ഒന്നേകാല്‍ ലക്ഷം അനീഷ് നല്‍കണമെന്നും അല്ലെങ്കില്‍ കൊന്നു കളയുമെന്നും ഭീഷണിപ്പെടുത്തി. പിന്നീട് ആളൊഴിഞ്ഞ സ്ഥലത്തെത്തിച്ച് രണ്ടര മണിക്കൂറോളം ക്രൂരമായി മര്‍ദിച്ചു. മര്‍ദനം നീണ്ടതോടെ ഒരു ലക്ഷം നല്‍കാമെന്ന് അനീഷ് സമ്മതിച്ചു.
തുടര്‍ന്ന് വാഹനത്തില്‍ വണ്ണപ്പുറം ഗവ. ആശുപത്രി ഗ്രൗണ്ടിലെത്തിച്ചു. ഇവിടെ വച്ച് മുദ്രപത്രത്തില്‍ ബലമായി ഒപ്പിട്ടു വാങ്ങി. വിവരം പുറത്ത് പറഞ്ഞാല്‍ കൊന്നുകളയുമെന്ന് ഭീഷണിപ്പെടുത്തി കാറില്‍ നിന്നും ഇറക്കിവിടുകയായിരുന്നു. വിവരമറിഞ്ഞ് സ്ഥലത്തെത്തിയ ബന്ധുക്കള്‍ അനീഷിനെ ആശുപത്രിയില്‍ എത്തിക്കുകയായിരുന്നു. എസ്ഐയുടെ നേതൃത്വത്തില്‍ പോലീസ് ആശുപത്രിയില്‍ എത്തി അനീഷില്‍ നിന്നും മൊഴിയെടുത്തു. പ്രതികള്‍ക്കായി അന്വേഷണം ആരംഭിച്ചതായി കാളിയാര്‍ എസ്‌ഐ വി.സി. വിഷ്ണുകുമര്‍ പറഞ്ഞു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: