പാലാ: ബിരുദ വിദ്യാര്‍ത്ഥി അഞ്ജു പി ഷാജി ആത്മഹത്യ ചെയ്ത സംഭവത്തില്‍ എംജി സര്‍വകലാശാലയെയും വിസിയെ വെല്ലുവിളിച്ച് പാലാ രൂപത. ചേര്‍പ്പുങ്കലിലെ ബിഷപ്പ് വയലല്‍ മെമ്മോറിയല ഹോളിക്രോസ് പ്രിന്‍സിപ്പലിനെ സംരക്ഷിച്ചും സര്‍വകലാശാല വിസിയെ വ്യക്തിപരമായി അധിക്ഷേപിച്ചുകൊണ്ടുമാണ് പാലാ രൂപത രംഗത്തെത്തിയിരിക്കുന്നത്.
വിദ്യാഭ്യാസത്തിന്റെ പ്രാഥമികപാഠങ്ങള്‍ അറിയാവുന്നവര്‍ക്കും എം.ജി. സര്‍വകലാശാലയുടെ സ്റ്റാറ്റിയൂട്സ് അല്‍പമെങ്കിലും പരിചയമുള്ളവര്‍ക്കും പ്രിന്‍സിപ്പലിന്റെ പ്രവര്‍ത്തനത്തെ ശ്ലാഘിക്കാനല്ലാതെ കുറ്റപ്പെടുത്താന്‍ സാധിക്കില്ലെന്നാണ് രൂപതയുടെ നിലപാട്. എം.ജി. സര്‍വകലാശാലയുടെ സ്റ്റാറ്റിയൂട്സിലെ ഏതു നിയമമനുസരിച്ചാണ് സി.സി.ടിവി ദൃശ്യങ്ങള്‍ മാനേജ്മെന്റ് പുറത്തുവിടരുതെന്ന് വാദിക്കുന്നതെന്നും വേദനാജനകമാംവിധം തെറ്റിദ്ധരിപ്പിക്കപ്പെടുകയും ക്രൂരമാംവിധം വിമര്‍ശിക്കപ്പെടുകയും ചെയ്യുമ്പോള്‍ വസ്തുതകള്‍ വെളിവാക്കാന്‍ പ്രിന്‍സിപ്പല്‍ ദൃശ്യങ്ങള്‍ പ്രയോജനപ്പെടുത്തരുതെന്നാണോ സര്‍വകലാശാല ഉദ്ദേശിക്കുന്നതെന്നും പാലാ രൂപത പത്രക്കുറിപ്പില്‍ ചോദിച്ചു.
ആ കുട്ടിയെ അപമാനിതയാക്കാന്‍ പാടില്ല എന്നതുകൊണ്ടാണ് ഇന്‍വിജിലേറ്ററും പ്രിന്‍സിപ്പലും കുട്ടിയെ എഴുന്നേല്‍പ്പിക്കുകപോലും ചെയ്യാതെ ശാന്തവും സൗമ്യവുമായ രീതിയില്‍ സംസാരിച്ചത്. കുട്ടിയെ ഉടന്‍ വിളിച്ച് ഓഫീസില്‍ കൊണ്ടുപോയി അടുത്ത നടപടിക്രമങ്ങള്‍ സ്വീകരിക്കണമായിരുന്നു എന്ന വാദം കണ്ടു. ഇപ്പോള്‍ വൈസ് ചാന്‍സലര്‍ നടപ്പിലാക്കാന്‍ പോകുന്ന കൗണ്‍സിലിങ് കോളജിലെ പ്രമുഖയായ അധ്യാപിക വഴി നല്‍കിയതു കുട്ടിക്കു യാതൊരു മനോവിഷമവും ഉണ്ടാകാതിരിക്കാനാണ്. ഇതു സി.സി.ടിവിയില്‍ വ്യക്തമാണ്. അധ്യാപിക ആ ദൗത്യം കാര്യക്ഷമമായി നിര്‍വഹിക്കുകയും ചെയ്തു. അതിനാണ് കുട്ടിയെ കൂടുതല്‍ സമയം ഹാളിലിരുത്തിയെന്ന പഴി കേള്‍ക്കേണ്ടിവന്നത്.
കോളജ് കത്തോലിക്കാ സ്ഥാപനമായതുകൊണ്ടും പ്രിന്‍സിപ്പല്‍ കത്തോലിക്കാ പുരോഹിതനായതുകൊണ്ടും അദ്ദേഹം ചെയ്ത നന്മകള്‍ തിന്മകളായി വ്യാഖ്യാനിച്ചാല്‍ സ്വീകാര്യത തനിക്കു വര്‍ധിക്കുമെന്നു വൈസ് ചാന്‍സലര്‍ കരുതുന്നുണ്ടാവാം. കുട്ടിയുടെ ഹാള്‍ ടിക്കറ്റ് പരസ്യമായി പ്രദര്‍ശിപ്പിച്ചു എന്നതു കടുത്ത നിയമലംഘനമെന്നപോലെ വ്യാഖ്യാനിച്ചു കണ്ടു. ഹാള്‍ ടിക്കറ്റ് പ്രദര്‍ശിപ്പിക്കരുതെന്ന് നിയമമുള്ളതായി മുന്‍ വൈസ് ചാന്‍സലര്‍മാര്‍ ഉള്‍പ്പെടെയുള്ളവര്‍ക്ക് അറിയില്ല. ഇവിടെ പ്രദര്‍ശിപ്പിക്കപ്പെട്ടതാകട്ടെ ഹാള്‍ ടിക്കറ്റിന്റെ കോപ്പിയും കോപ്പിയടിച്ച ഭാഗവുമാണ്. അങ്ങനെ ചെയ്തിരുന്നില്ലെങ്കില്‍ മാനേജ്മെന്റ്തന്നെ ഇത് എഴുതിച്ചേര്‍ത്തതാണെന്ന പച്ച നുണ വിശ്വസിക്കാന്‍ സത്യസന്ധരായവര്‍പോലും നിര്‍ബന്ധിക്കപ്പെട്ടേനെ.
ഹാള്‍ ടിക്കറ്റ് ഉള്‍പ്പെടെയുള്ള രേഖകള്‍ പരിശോധിക്കാതെയും സാക്ഷി മൊഴികള്‍ എടുക്കാതെയും തയാറാക്കിയ ഉപസമിതിയുടെ താത്കാലിക റിപ്പോര്‍ട്ടിന്റെ അടിസ്ഥാനത്തില്‍ പത്രസമ്മേളനം നടത്തിയ വൈസ് ചാന്‍സലര്‍, പ്രിന്‍സിപ്പലിനെ മാറ്റുകയാണോ സ്വയം മാറുകയാണോ ചെയ്യേണ്ടതെന്ന ചോദ്യത്തിന് അദ്ദേഹംതന്നെ ഉത്തരം പറയട്ടെ. ഉപസമിതിയുടെ പൂര്‍ണ റിപ്പോര്‍ട്ട് തയാറായി സിന്‍ഡിക്കേറ്റ് അംഗീകരിച്ചാല്‍മാത്രമേ അതു യൂണിവേഴ്സിറ്റിയുടേതാകൂ എന്നിരിക്കെ വി.സിയുടെ തിടുക്കം മറ്റെന്തിനോ വേണ്ടിയാണെന്നു സംശയിച്ചേക്കാം. ഇത്തരം കാര്യങ്ങളില്‍ ഏതെങ്കിലും വി.സി. ഇതുപോലൊരു പത്രസമ്മേളനം നടത്തിയിട്ടില്ല. കുട്ടിയുടെ മരണം അതീവ ദുഃഖകരമാണ്. അതുപോലെതന്നെ പ്രിന്‍സിപ്പലിനെ തേജോവധം ചെയ്യുന്നത് അത്യന്തം ഖേദകരമാണ്. യഥാര്‍ഥത്തില്‍ വി.സി. അപമാനിച്ചത് അധ്യാപക സമൂഹത്തെ മുഴുവനാണ്. കോപ്പിയടിക്കാന്‍ പ്രോത്സാഹിപ്പിക്കണമെന്നാണോ അത്തരം അവസരങ്ങളില്‍ നിസംഗനായി കടന്നുപോകണമെന്നാണോ അദ്ദേഹം അര്‍ഥമാക്കുന്നത്. ഇക്കാര്യങ്ങളിലുള്ള നിലപാട് വ്യക്തമാക്കാന്‍ അദ്ദേഹം പരസ്യ സംവാദത്തിനു തയാറാകണമെന്നും പാലാ രൂപത ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: