പാലക്കാട്: കഞ്ചിക്കോട് വനിത ഹോസ്റ്റലിലെ സെക്യൂരിറ്റി ജീവനക്കാരനെ തലക്കടിച്ച് കൊന്ന കേസില് പ്രതിയെ തിരിച്ചറിഞ്ഞു. പാലക്കാട് നഗരത്തിലെ ടാക്സി ഡ്രൈവറും യാക്കര സ്വദേശിയുമായ പ്രതി അപകടത്തില്പ്പെട്ട് ജില്ലാശുപത്രിയില് അബോധാവസ്ഥയില്. ഇതുമൂലം ഇയാളെ കസ്റ്റഡിയിലെടുത്ത് ചോദ്യം ചെയ്യാന് പോലീസിന് കഴിഞ്ഞിട്ടില്ല. പ്രതി 30-ാം തീയതി രാത്രി പാലക്കാട് മെഡിക്കല് കോളേജിന് മുന്നില് എതിര്ദിശയില് അമിത വേഗതയില് കാറോടിച്ച് വന്ന് ലോറിയില് ഇടിക്കുകയായിരുന്നു.
28ന് രാത്രി 12നാണ് കഞ്ചിക്കോട് ദേശീയപാതയോരത്തുള്ള വനിത ഹോസ്റ്റലിലെ സെക്യൂരിറ്റിയും, വിമുക്ത ഭടനുമായ കോഴിക്കോട് കണ്ണോത്ത് പൂത്തോട് മത്തായി മകന് പി.എം. ജോണി(72)നെ ആക്രമിച്ചത്. ഹോസ്റ്റലിലേക്ക് അതിക്രമിച്ചു കയറിയ പ്രതി ജോണിനെ തള്ളിയിടുകയും ഇരുമ്പുവടികൊണ്ട് അടിക്കുകയുമായിരുന്നു. പാലക്കാട്ടെ സ്വകാര്യ ആശുപത്രിയില് എത്തിച്ചെങ്കിലും ജോണ് മരിച്ചു.
പ്രതി വര്ഷങ്ങളായി പാലക്കാട് നഗരത്തിലെ ടാക്സി ഡ്രൈവറാണ്. ജോണിനെ അക്രമിച്ച സിസിടിവി ദൃശ്യങ്ങള് അടുത്ത ദിവസം തന്നെ പുറത്തുവന്നിരുന്നു.
