തൃക്കരിപ്പൂര്‍: മാടക്കാലില്‍ സമുദായ ശമ്ശാനത്തിന്റെ നിര്‍മ്മാണം നടക്കുന്ന ചുറ്റു മതില്‍ സമൂഹ്യ വിരുദ്ധര്‍ തകര്‍ത്തു. മടക്കാല്‍ ഗുളിക്കരാജ ക്ഷേത്രത്തിന്റെ പരിധിയിലെ തീയ്യ സമുദായക്കാര്‍ കാലങ്ങളായി ഉപയോഗിച്ചു വരുന്ന ശ്മശാനത്തിന്റെ മതിലാണ് രാത്രിയുടെ മറവില്‍ പൊളിച്ചിട്ടത്.
മാടക്കാല്‍ അംഗന്‍വാടിക്ക് സമീപത്തെ ശ്മശാനത്തിന്റെ മതില്‍ നിര്‍മ്മാണമാണ് സാമൂഹ്യ വിരുദ്ധര്‍ തകര്‍ത്തത്. പരിസരത്തെ മൈതാനവുമായി അതിര്‍ത്തി പങ്കിടുന്നതാണ് ശ്മശാനം. പഴയ അതിര്‍ത്തി പ്രകാരം കല്ലു കെട്ടുന്നതിനിടയില്‍ വാര്‍ഡു മെമ്പറുടെയും വികസന സമിതി നേതാക്കളുടെയും അഭ്യര്‍ത്ഥന മാനിച്ച് ഒരു കല്ല് പിറകോട്ട് അതിര്‍ത്തിവെച്ചാണ് മതില്‍ കെട്ടാന്‍ തുടങ്ങിയത്. ഇതുപ്രകാരം മൂന്നുവരി പൂര്‍ത്തിയായ മതിലാണ് ഇന്നലെ തകര്‍ത്തത്.
സംഭവവുമായി ബന്ധപ്പെട്ട് ശ്മശാന കമ്മറ്റി ചന്തേര പോലീസില്‍ പരാതി നല്‍കിയതിന്റെ അടിസ്ഥാനത്തില്‍, പോലീസ് സ്ഥലത്തെത്തി അന്വേഷണമാരംഭിച്ചു. ചുറ്റുമതില്‍ തകര്‍ക്കപ്പെട്ട സ്ഥലം സംഘപരിവാര്‍ നേതാക്കളായ ഷിബിന്‍ തൃക്കരിപ്പൂര്‍, കെ.ബവിത്ത്, എ.വി സുധാകരന്‍, കെ.കരുണാകരന്‍, എ.വി കുമാരന്‍. എന്നിവര്‍ സന്ദര്‍ശിച്ചു. സംഭവത്തിന് പിന്നില്‍ പ്രവര്‍ത്തിച്ച സാമൂഹ്യ ദ്രോഹികള്‍ക്കെതിരെ ശക്തമായ നടപടിയെടുക്കണമെന്ന് ഇവര്‍ ആവശ്യപ്പെട്ടു. അല്ലാത്തപക്ഷം വിശ്വാസികളെ അണിനിരത്തി സമരം സംഘടിപ്പിക്കുമെന്ന് നേതാക്കള്‍ പറഞ്ഞു.
