അടിമാലി: രാവിലെ നടന്ന വിഎച്ച്എസ്ഇ പരീക്ഷ ഉച്ചയ്ക്കാണെന്ന് തെറ്റിധരിച്ച വിദ്യാര്ത്ഥിയെ പോലീസ് വാഹനത്തില് സ്കൂളിലെത്തിച്ചു എത്തിച്ചു. അടിമാലി എസ്എന്ഡിപി സ്കൂളിലെ വിഎച്ച്എസ്ഇ വിഭാഗത്തിലെ രണ്ടാം വര്ഷ ഇഇടി വിദ്യാര്ത്ഥിയായ പണിക്കന് കുടി കൊമ്പൊടിഞ്ഞാല് സ്വദേശിയായ അതുല് ഷിജോയെയാണ് പരീക്ഷ തുടങ്ങി അര മണിക്കൂറിനുള്ളില് പോലീസ് വാഹനത്തില് പരീക്ഷക്കായി എത്തിച്ചത്. 194 വിദ്യാര്ത്ഥികളാണ് ഇവിടെ ആകെ പരീക്ഷ എഴുതാനുണ്ടായിരുന്നത്. എന്നാല് അതുല് പരീക്ഷയെഴുതാന് എത്താതിരുന്നതോടെ അധ്യാപകര് രക്ഷിതാക്കളെ ഫോണില് വിളിച്ച് അന്വേഷിച്ചപ്പോഴാണ് വിവരം അറിഞ്ഞത്.
അധ്യാപകര് വിവരം സ്കൂള് മുറ്റത്തുണ്ടായിരുന്ന പോലീസ് ഉദ്യോഗസ്ഥരെ അറിയിച്ചു. നിശ്ചിത സമയത്തിനുള്ളില് വിദ്യാര്ത്ഥിയെ സ്കൂളിലെത്തിച്ചാല് പരീക്ഷക്കിരുത്താനാകുമെന്ന് സ്കൂള് അധികൃതര് പോലീസിനെ അറിയിച്ചതോടെ ജനമൈത്രി കമ്മ്യൂണിറ്റി റിലേഷന് ഓഫീസര് എസ്ഐ കെ.ഡി. മണിയന്റെ നേതൃത്വത്തിലുള്ള പോലീസ് സംഘം വിദ്യാര്ത്ഥിയുടെ വീട്ടിലേക്ക് പുറപ്പെട്ടു.
സമയക്രമം തെറ്റിയ വിവരം മാതാപിതാക്കള് അറിഞ്ഞതോടെ വിദ്യാര്ത്ഥിയെ മറ്റൊരു വാഹനത്തില് അഞ്ചാംമൈലില് എത്തിച്ചിരുന്നു. ഇവിടെ നിന്ന് പോലീസ് വാഹനത്തില് അതുല് സ്കൂളിലെത്തി പരീക്ഷ എഴുതി. കൃത്യസമയത്ത് പോലീസ് ഇടപെട്ടതിനാല് പരീക്ഷയെഴുതാന് കഴിഞ്ഞെന്നും പരീക്ഷ എളുപ്പമായിരുന്നെന്നും അതുല് പറഞ്ഞു.
