പെരുമ്പാവൂര്: വിശാഖപട്ടണത്ത്നിന്നും പെരുമ്പാവൂരിലേക്ക് ലോറിയില് കഞ്ചാവ് കടത്തിയ പ്രതികളെ കുന്നത്തുനാട് എക്സൈസ് പിടികൂടി. തൃശൂര് പീച്ചി ചെറിയംകുഴി കരയില് തെക്കേല് വീട്ടില് കിങ്ങിണി എന്ന് വിളിക്കുന്ന ഷിജോ (25), പെരുമ്പാവൂര് തണ്ടേക്കാട് പുത്തന്വാട് പറമ്പില് വീട്ടില് ബിലാല് എന്ന് വിളിക്കുന്ന ബിനു (35) എന്നിവരാണ് എക്സൈസിന്റെ പിടിയിലായത്.
കൊല്ലം ടൈറ്റാനിയം കമ്പനിയില്നിന്ന് വിശാഖപട്ടണത്തേക്ക് ലോറിയില് കമ്പി കയറ്റിപ്പോകുന്നവര് തിരികെ വരുമ്പോള് കയറ്റിക്കൊണ്ട് വരുന്ന ഉണക്കമീനിന്റെ മറവിലാണ് കഞ്ചാവ് കടത്തിയിരുന്നത്. എക്സൈസ് കമ്മീഷണര്ക്ക് ലഭിച്ച രഹസ്യവിവരത്തിന്റെ അടിസ്ഥാനത്തില് കുന്നത്തുനാട് എക്സൈസ് ഇന്സ്പെക്ടര് കെ.എസ്. മുഹമ്മദ് ഹാരിഷും സംഘവും പെരുമ്പാവൂര് പാലക്കാട്ട്താഴത്ത് നടത്തിയ പരിശോധനയിലാണ് പ്രതികള് പിടിയിലായത്.
പ്രതികളില്നിന്ന് പതിനാറര കിലോ കഞ്ചാവും എക്സൈസ് അധികൃതര് പിടിച്ചെടുത്തു. ഇതിന് വിപണിയില് 8 ലക്ഷത്തോളം രൂപ വിലവരുമെന്നും അധികൃതര് അറിയിച്ചു.
കഞ്ചാവ് കടത്താനുപയോഗിച്ച ലോറിയും എക്സൈസ് കസ്റ്റഡിയിലെടുത്തു. സംഭവത്തിന് പിന്നില് കൂടുതല് പ്രതികളുണ്ടോയെന്ന് അന്വേഷിച്ച് വരികയാണെന്ന് അധികൃതര് പറഞ്ഞു.
