കാസര്കോട്: സ്വന്തം വീട്ടില് നിന്നും വ്യാജമദ്യം പിടിച്ച സാഹചര്യത്തില് ഉമേശ് സാലിയാന് കേരള തുളു അക്കാദമി അദ്ധ്യക്ഷസ്ഥാനം രാജി വെക്കാന് തയ്യാറാകണമെന്ന് ബിജെപി ജില്ലാ പ്രസിഡന്റ് അഡ്വ. കെ. ശ്രീകാന്ത് ആവശ്യപ്പെട്ടു. ലോക്ക്ഡൗണ് സമയത്ത് തുളു അക്കാദമിയുടെ ബോര്ഡ് വച്ചുള്ള വാഹനമാണ് വ്യാജമദ്യം കടത്താന് ഉപയോഗിച്ചതെന്ന് തെളിഞ്ഞിരിക്കുകയാണ്.
പൊതുസമൂഹത്തിനു തന്നെ നാണക്കേടുണ്ടാക്കിയ സംഭവമായതിനാല് ആ സ്ഥാനത്ത് തുടരാന് ഉമേശ് സാലിയാന് അര്ഹതയില്ലെന്നും ശ്രീകാന്ത് പറഞ്ഞു. കേസ് അട്ടിമറിക്കാന് ഉന്നതതലത്തില് ഗൂഡാലോചന നടക്കുകയാണ്. സംഭവത്തെ കുറിച്ചന്വേഷിക്കാന് പ്രത്യേക സംഘത്തെ നിയോഗിക്കണമെന്നും ശ്രീകാന്ത് ആവശ്യപ്പെട്ടു.
