തിരുവനന്തപുരം: അനുവദിക്കപ്പെട്ട ജോലികള്ക്ക് ജില്ല വിട്ടു ദിവസേന യാത്ര ചെയ്യുന്ന സ്വകാര്യ മേഖലയില് ഉള്ളവര്ക്കായി ഒരാഴ്ച കാലാവധിയുള്ള പാസ് പൊലീസ് നല്കുമെന്ന് മുഖ്യമന്ത്രി പിണറായി വിജയന് പറഞ്ഞു. ഇതിനായി അതതു സ്റ്റേഷന് ഹൗസ് ഓഫീസര്മാരെയാണ് സമീപിക്കേണ്ടത്.
ജില്ല വിട്ടു യാത്ര ചെയ്യുന്നതിന് പാസ് ലഭിക്കുന്നതിന് ഓണ്ലൈന് സംവിധാനം ഏര്പ്പെടുത്തിയിട്ടുണ്ട്. ഓണ്ലൈന് സംവിധാനത്തിലൂടെ പാസ് ലഭിക്കുന്നതിന് ബുദ്ധിമുട്ടുള്ളവര്ക്ക് പാസിന്റെ മാതൃക പൂരിപ്പിച്ച് അതുമായി ബന്ധപ്പെട്ട സ്റ്റേഷന് ഹൗസ് ഓഫീസര്മാരെ സമീപിച്ചു നേരിട്ട് പാസ് വാങ്ങാം.
ലോക്ഡൗണ് ഘട്ടത്തില് ഓട്ടോറിക്ഷകള്ക്ക് ഓടാന് അനുവാദമില്ല. ചെറിയ ആവശ്യങ്ങള്ക്ക് ഓട്ടോ അനുവദിക്കാമോ എന്ന് കേന്ദ്ര സര്ക്കാരിനോട് ആരായും
അഭിഭാഷകര്ക്ക് ഔദ്യോഗിക ആവശ്യാര്ത്ഥം അന്തര്ജില്ലാ യാത്രകള്ക്ക് അനുവാദം നല്കും. കോടതികള് പ്രവര്ത്തിക്കുന്നുണ്ടെങ്കില് അഡ്വക്കേറ്റുമാര്ക്ക് ഹാജരാകാന് സൗകര്യമുണ്ടാക്കും.
പെന്ഷന്, ക്ഷേമനിധികളുടെ ആനുകൂല്യം ലഭിക്കാത്തവര്ക്ക് സര്ക്കാര് ആയിരം രൂപ വീതം സഹായം നല്കുന്നെതിന്റെ വിതരണം സഹകരണവകുപ്പ് അടുത്ത വ്യാഴാഴ്ച ആരംഭിക്കും. മെയ് 25നകം വിതരണം പൂര്ത്തിയാക്കും.
വിശാഖപട്ടണത്തുണ്ടായ വിഷവാതകച്ചോര്ച്ചയുടെ പശ്ചാത്തലത്തില് സംസ്ഥാനത്തെ രാസവസ്തു ശാലകളിലും ലോക്ക്ഡൗണിനുശേഷം തുറക്കേണ്ട ഇതര വ്യവസായ സ്ഥാപനങ്ങളുടെയും സുരക്ഷാ മുന്കരുതലുകള് ഉറപ്പുവരുത്തും. നിര്മാണ പ്രവര്ത്തനങ്ങള്ക്ക് അനുമതി നല്കിയിട്ടുണ്ട്. തുടര്ച്ചയായി പ്രവര്ത്തിക്കേണ്ട വ്യവസായങ്ങള്ക്ക് ഇളവുനല്കും. അവശ്യംവേണ്ട ഭക്ഷണശാലകള്ക്കും ഇളവ് നല്കിയിട്ടുണ്ട്.
