പെരിയ (കാസര്കോട്): ലോക്ഡൗണില് കുരുങ്ങിയ ഉത്തര്പ്രദേശിലെ ഗോണ്ട ജില്ലയില് നിന്നുള്ള 20 നവോദയ വിദ്യാര്ഥികള് കേന്ദ്ര സര്ക്കാരിന്റെ കരുതലില് നാട്ടിലേക്ക് യാത്രതിരിച്ചു.ബസ്മാര്ഗം 2400 കിലോമീറ്റര് സഞ്ചരിച്ചാണ് വിദ്യാര്ഥികള് യുപിയിലേക്ക് പോകുന്നത്.
ദേശീയോദ്ഗ്രഥനം ലക്ഷ്യമാക്കിയുള്ള മൈഗ്രേഷന് പോളിസിയുടെ ഭാഗമായി ഒരു വര്ഷം കേരളത്തില് പഠിക്കാനെത്തിയതായിരുന്നു നേപ്പാള് അതിര്ത്തിയിലുള്ള മന്കാപ്പൂര് നവോദയ വിദ്യാലയയിലെ 12 ആണ്കുട്ടികളും ഒന്പതു പെണ്കുട്ടികളുമടങ്ങുന്ന സംഘം. ഒരു പെണ്കുട്ടി അസുഖത്തെത്തുടര്ന്ന് നേരത്തെ തിരിച്ചുപോയി. ഉത്തരേന്ത്യയിലെ കുട്ടികള് ദക്ഷിണേന്ത്യയിലുംതിരിച്ചും ഒരു വര്ഷം താമസിച്ച് പഠിച്ച് ഭാഷയും സംസ്കാരവും പഠിക്കാനും അനുഭവിക്കാനുമുള്ള നവോദയയുടെ പ്രത്യേക പദ്ധതിയാണ് മൈഗ്രേഷന് പോളിസി.
വര്ഷാന്ത പരീക്ഷകള്ക്കുശേഷം മാര്ച്ച് 25ന് തിരിച്ചു പോകാനിരുന്ന കുട്ടികളാണ് ലോക്ഡൗണില് പെട്ട് ഒന്നര മാസത്തോളം കേരളത്തില് കുടുങ്ങിയത്. കേന്ദ്ര സര്ക്കാര് ഇതരസംസ്ഥാന വിദ്യാര്ഥികള്ക്കും തൊഴിലാളികള്ക്കും യാത്രാ ഇളവ് അനുവദിച്ചതോടെ കുട്ടികളെ നാട്ടിലെത്തിക്കാനുള്ള പരിശ്രമത്തിലായിരുന്നു കാസര്കോട് പെരിയയിലെ നവോദയ സ്കൂള് അധികൃതര്. പ്രത്യേകം ഏര്പ്പാടാക്കിയ ബസ്സിലാണ് സാമൂഹിക അകലവും സുരക്ഷാ മാനദണ്ഡങ്ങളും പാലിച്ചുകൊണ്ടുള്ള യാത്ര. കാസര്കോട് നിന്നുള്ള ബസ്സ് 1200 കിലോമീറ്റര് സഞ്ചരിച്ച് തെലുങ്കാനയിലെ ആദിലാബാദില് വച്ച് കുട്ടികളെ ഗോണ്ടാ നവോദയയില് നിന്നെത്തുന്ന അധ്യാപകര്ക്ക് കൈമാറും. തുടര്യാത്ര ഉത്തര്പ്രദേശില് നിന്നുള്ള ബസ്സിലായിരിക്കും.
കേന്ദ്ര മാനവവിഭവശേഷി വകുപ്പിനു കീഴിലുള്ള നവോദയ വിദ്യാലയ സമിതിയാണ് യാത്രാ ചെലവ് വഹിക്കുന്നത്. പെരിയ നവോദയയിലെ അധ്യാപകന് എം.വി. ശൈലേന്ദ്രന്, ബിഹാര് സ്വദേശിയായ ലാബ് അസിസ്റ്റന്റ് രാകേശ്കുമാര്, യുപി സ്വദേശിനി മായാദേവി എന്നിവരുടെ നേതൃത്വത്തിലാണ് യാത്ര. കാസര്കോട് നവോദയയില് നിന്ന് ഗോണ്ടാ നവോദയയിലേക്ക് പോയിരുന്ന വിദ്യാര്ത്ഥികളെ മാര്ച്ച് 22ന് തന്നെ നാട്ടിലെത്തിച്ചിരുന്നു.
ജന്മഭൂമി ഓണ്ലൈന്