കൊച്ചി: ഹൃദയ സംബന്ധമായ അസുഖങ്ങള്‍ കൊണ്ട് വിഷമിക്കുമ്പോഴും കടലാസില്‍ തീര്‍ത്ത കരകൗശല വസ്തുക്കള്‍ വിറ്റു ലഭിച്ച 4350 രൂപ മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കി അതുല്യ. ജനിച്ച നാള്‍ മുതല്‍ അസുഖങ്ങള്‍ കൂടെയുള്ള അതുല്യക്ക് ജീവിതത്തിലെ ഏറ്റവും സന്തോഷം നല്‍കിയ തീരുമാനമാണ് ഇതെന്ന് മാതാപിതാക്കള്‍. ഇടക്കൊച്ചി കുമ്പളം ഫെറി വരിക്കശ്ശേരി അശോകന്‍- അമ്പിളി ദമ്പതികളുടെ മകളാണ് അതുല്യ.
35 വര്‍ഷമായി മരുന്നുകളുടെ സഹായത്തോടെയാണ് ജീവന്‍ നിലനിര്‍ത്തുന്നത്. ഹൃദയ വാല്‍വിന് തകരാറായ അതുല്യയ്‌ക്ക് ആറു മാസം പ്രായമായപ്പോള്‍ ആദ്യ ശസ്ത്രക്രിയ നടത്തി. വാല്‍വിന്റെ പ്രശ്‌നങ്ങള്‍ പരിഹരിച്ചുവെങ്കിലും അസുഖങ്ങള്‍ വീണ്ടും പിന്തുടര്‍ന്നു. അഞ്ചാം ക്ലാസുവരെ സ്‌കൂളില്‍ പോകാനായി. അതിനു ശേഷം പുറത്തിറങ്ങാന്‍ കഴിയാതെ വീട്ടില്‍ തന്നെ.
അപ്പോഴാണ് കരകൗശല വസ്തുക്കളുടെ നിര്‍മാണം തുടങ്ങിയത്. മനസ്സില്‍ പതിയുന്നവ പേപ്പറില്‍ മെനഞ്ഞെടുക്കും. ടിവി പരിപാടികളില്‍ കാണുന്ന വസ്തുക്കള്‍ നിമിഷ നേരത്തില്‍ പേപ്പറില്‍ തീര്‍ക്കും. പിന്നീട് വീട്ടുകാരും നാട്ടുകാരും പ്രോത്സാഹനവുമായി അതുല്യയോടൊപ്പം ചേര്‍ന്നു.
വീടു മുഴുവന്‍ പേപ്പര്‍ വിസ്മയങ്ങള്‍ നിറഞ്ഞപ്പോള്‍ സന്ദര്‍ശകര്‍ വന്നു തുടങ്ങി. കാണാനെത്തുന്നവര്‍ ഇഷ്ടപ്പെട്ട സാധനങ്ങള്‍ എടുത്ത് പണം നല്‍കും. ഇത്തരത്തില്‍ പലപ്പോഴായി ലഭിച്ച തുകകള്‍ കൂട്ടിയാണ് അതുല്യ മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കിയത്. തുക ജോണ്‍ ഫെര്‍ണാണ്ടസ് എംഎല്‍എ ഏറ്റുവാങ്ങി.
