ബെംഗളൂരു: മലയാളിയായ ഒളിമ്പിക്‌സ് നീന്തല്‍ താരം സാജന് പ്രകാശ് തായ്‌ലന്‍ഡിലെ ഫുകെറ്റില്‍ സുഖമായിരിക്കുന്നു. ഒളിമ്പിക്‌സ് ലക്ഷ്യമിട്ട് ഫുകെറ്റിലെ ഫിന പരിശീലന കേന്ദ്രത്തില്‍ പരിശീലനത്തിനെത്തിയതാണ് സാജന് പ്രകാശ്. കൊറോണ പടര്‍ന്നു പിടിച്ചതിനാല്‍ മൂന്നാഴ്ച മുമ്പ് പരീശിലനം നിര്‍ത്തിവച്ചു. തുടര്‍ച്ചയായ രണ്ടാം ഒളിമ്പിക്‌സെന്ന സ്വപ്‌നം സാക്ഷാത്ക്കരിക്കാന്‍ സാജന് ഇനി ഒരു വര്‍ഷം കൂടി കാത്തിരിക്കണം. ഈ വര്‍ഷം നടത്താനിരുന്ന ടോക്കിയോ ഒളിമ്പിക്‌സ് കോറോണയുടെ പശ്ചാത്തലത്തില്‍ അടുത്ത വര്‍ഷത്തേക്ക് മാറ്റിവച്ചിരിക്കുകയാണ്.
തായ്‌ലന്‍ഡിലും കോറോണ പടരുകയാണ്. സാജനൊപ്പം ഇവിടത്തെ ഫിന പരിശീലന കേന്ദ്രത്തില്‍ പരിശീലനം നടത്തി നാട്ടിലേക്ക് മടങ്ങിയ ഹങ്കേറിയന്‍ ടീമിലെ പലര്‍ക്കും കൊവിഡ് – 19 ബാധിച്ചിട്ടുണ്ട്. പതിനഞ്ച് മുതല്‍ ഇരുപതുവരെ പേര്‍ ഹങ്കേറിയിന്‍ ടീമിലുണ്ടായിരുന്നു. നാട്ടിലേക്ക് മടങ്ങിയ ഇവരില്‍ ഒമ്പത് പേര്‍ക്ക് കൊറോണ ബാധിച്ചെതായി അറിയാന്‍ കഴിഞ്ഞെന്ന് സാജന് പ്രകാശ് വാര്‍ത്ത ഏജന്‍സിയോട് പറഞ്ഞു.അന്ന് ഹങ്കേറിയന്‍ ടീം ഭക്ഷണം കഴിക്കാന്‍ ഉപയോഗിച്ച സ്ഥലം തന്നെയാണ് ഞങ്ങളും ഉപയോഗിച്ചിരുന്നത്. എന്നാല്‍ ആ ഒമ്പത് പേര്‍ക്ക് മാത്രമേ രോഗം ബാധിച്ചുള്ളൂ.
മറ്റ് കേസുകളൊന്നും ഇതുവരെ റിപ്പോര്‍ട്ട് ചെയ്തിട്ടില്ല. മാര്‍ച്ച് പന്ത്രണ്ടിനാണ് ഹങ്കേറിയന്‍ ടീം പരിശീലന കേന്ദ്രത്തില്‍ നിന്ന് മടങ്ങിയത്. മാര്‍ച്ച് പതിനേഴിന് പരിശീലന കേന്ദ്രം പൂട്ടി. ഇപ്പോള്‍ ഇവിടെ ലോക് ഡൗണാണ്. ഹോസ്റ്റലില്‍ നിന്ന്് ആരെയും പുറത്ത് പോകാന്‍ അനുവദിക്കുന്നില്ല. ഹോസ്റ്റലിലുള്ള ആര്‍ക്കും രോഗ ലക്ഷണമില്ല.
സമീപത്തെ സ്‌കൂളിലെ രണ്ട് അധ്യാപകര്‍ക്ക് രോഗം ബാധിച്ചിട്ടുണ്ട്. ഞാന്‍ ഇവിടെ സുഖമായിരിക്കുന്നു. സാമൂഹിക അകലം പാലിച്ച് ഹോസ്റ്റലില്‍ തന്നെ കഴിയുയാണെന്ന്് സാജന് പറഞ്ഞു.തായ്‌ലന്‍ഡിലെ ഫുകെറ്റ് കോവിഡ് -19 ന്റെ ഹോട്ടസ്‌പോട്ടാണ്. ഇവിടെ 161 പേര്‍ക്ക് കൊറോണ സ്ഥിരികരിച്ചിട്ടുണ്ട്.
