ചൈനീസ് മാസ്‌ക്കുകള്‍ കൊറോണ വൈറസുകളെ ചെറുക്കാന്‍ ഉപകരിക്കില്ല; വീടുകളിലും മറ്റും മാത്രം ഉപയോഗിക്കാനാകുന്നതെന്ന് ഫിന്‍ലന്‍ഡ്

ഹെല്‍സിങ്കി: ചൈനീസ് മാസ്‌ക്കുകള്‍ കൊറോണ വൈറസുകളെ ചെറുക്കാന്‍ ഉപകരിക്കില്ലെന്നും വീടുകളിലും മറ്റും മാത്രം ഉപയോഗിക്കാനാകുന്നതാണെന്നും ഫിന്‍ലന്‍ഡ് സര്‍ക്കാര്‍.  

ചൊവ്വാഴ്ച ചൈനയിലെ ഗുവാംഗ്ഷൗവില്‍ നിന്നും 20 ലക്ഷം സര്‍ജിക്കല്‍ മാസ്‌കുകളും 230,000 റെസ്പിറേറ്റര്‍ മാസ്‌കുകളും വിമാനമാര്‍ഗം ഹെല്‍സിങ്കിയിലെത്തിച്ചിരുന്നു. എന്നാല്‍ ആശുപത്രി അന്തരീക്ഷത്തില്‍ കൊറോണ വൈറസുകളെ ചെറുക്കാന്‍ ചൈനീസ് മാസ്‌ക്കുകള്‍ ഉപകരിക്കില്ലെന്ന് ഫിന്‍ലന്‍ഡ് സര്‍ക്കാര്‍ വ്യക്തമാക്കി. ദിവസം 2,00,000 മാസ്‌കുകള്‍ വീതം നിര്‍മിക്കാന്‍ രാജ്യത്തെ മൂന്ന് കമ്പനികളുമായി കരാര്‍ ഏര്‍പ്പെട്ടതായി ഫിന്‍ലന്‍ഡ് അറിയിച്ചു. ദിനംപ്രതി ഒരു ലക്ഷം സര്‍ജിക്കല്‍ മാസ്‌കുകളും 50,000 റെസ്പിറേറ്റര്‍ മാസ്‌കുകളുമാണ് ഫിന്‍ലന്‍ഡിന് വേണ്ടത്.

കൊറോണ പ്രതിരോധ വസ്തുക്കള്‍ ചൈനയില്‍ നിന്നും ഇത്തരത്തില്‍ ഇറക്കുമതി ചെയ്ത മറ്റ് യൂറോപ്യന്‍ രാജ്യങ്ങളും പോരായ്മകള്‍ ചൂണ്ടിക്കാട്ടിയിരുന്നു. ചൈനീസ് ഫേസ്മാസ്‌കുകള്‍ അങ്ങേയറ്റം കുഴപ്പം നിറഞ്ഞതാണെന്ന് ഇവര്‍ ചൂണ്ടിക്കാട്ടുന്നു. ചൈനീസ് ഉത്പന്നങ്ങള്‍ വിലകുത്തനെ ഉയരുന്നുമുണ്ട്. വാങ്ങുന്നതിന് മുന്‍കൂട്ടി അഡ്വാന്‍സും നല്‍കണം. സ്‌പെയിന്‍, നെതര്‍ലന്‍ഡ്സ്, തുര്‍ക്കി, ഓസ്‌ട്രേലിയ രാജ്യങ്ങള്‍ ചൈനയില്‍ നിന്നും വാങ്ങിയ ഫേസ്മാസ്‌കുകള്‍ തിരികെ അയച്ചിരുന്നു. ചൈനയില്‍ നിന്നും ഇറക്കുമതി ചെയ്യുമ്പോള്‍ രണ്ടു തവണ പരിശോധിക്കണമെന്നും ഈ രാജ്യങ്ങള്‍ നിര്‍ദ്ദേശിക്കുന്നുണ്ട്.