തിരുവനന്തപുരം: രാജ്യവ്യാപകമായി ഏര്പ്പെടുത്തിയിട്ടുള്ള ലോക്ഡൗണ് അടുത്ത 21 ദിവസത്തേയ്ക്കു കൂടി നീട്ടണമെന്ന് ഇന്ത്യന് മെഡിക്കല് അസോസിയേഷന്(ഐഎംഎ) വിദഗ്ധ സമിതി. നിലവിലെ ലോക്ഡൗണ് ഏപ്രില് 14ന് അവസാനിക്കും. കോവിഡ് വ്യാപനത്തെ പ്രതിരോധിക്കുന്നതിന്റെ ഭാഗമായാണ് ലോക്ഡൗണ് ദീര്ഘിപ്പിക്കണമെന്ന് ആവശ്യം ഉന്നയിച്ചിരിക്കുന്നത്.
ഇക്കാര്യം ചൂണ്ടിക്കാട്ടി ഐഎംഎ മുഖ്യമന്ത്രിക്ക് കത്ത് നല്കിയതായി ഐഎംഎ യുടെ സംസ്ഥാന പ്രസിഡന്റ് ഡോ. എബ്രഹാം വര്ഗീസും, സെക്രട്ടറി ഡോ. ഗോപികുമാറും അറിയിച്ചു. കേരളത്തിലേയും, രാജ്യത്തിലേയും, രാജ്യാന്തര തലത്തിലേയുമുള്ള വിദഗ്ധരുമായി കഴിഞ്ഞ ഏതാനും ദിവസങ്ങളായി നടത്തി വന്ന ചര്ച്ചകള്ക്കൊടുവിലാണ് ഇത്തരമൊരുനിര്ദ്ദേശം ഐഎംഎ മുന്നോട്ടുവെച്ചത്.
ഇംഗ്ലണ്ട്, അമേരിക്ക, ഇറ്റലി, ജര്മ്മനി, സ്പെയിന് തുടങ്ങിയ രാജ്യങ്ങളിലേയും, ഇന്ത്യയിലെ പ്രമുഖ സ്ഥാപനങ്ങളില് ജോലി ചെയ്യുന്ന പൊതുജനാരോഗ്യ വിദഗ്ധരുമായും, കേരളത്തിലെ 50 ഓളം പൊതുജനാരോഗ്യ വിദഗ്ധരുമായും ഐഎംഎ ചര്ച്ചകള് നടത്തിയിരുന്നു. ഇതില് നിന്നും ഉണ്ടായ നിര്ദ്ദേശങ്ങളുടെ അടിസ്ഥാനത്തിലാണ് ഇത്തരമൊരു നിലപാട് ഐഎംഎ സ്വീകരിക്കുന്നത്.
കോവിഡ് 18 നിയന്ത്രണം കൊണ്ടുണ്ടായ നേട്ടം നിലനിര്ത്തുന്നതിന് അടുത്ത 21 ദിവസവും കൂടി ലോക്ക് ഡൗണ് തുടരേണ്ടതാണ്. കേരളത്തിലെ പ്രത്യേക സാഹചര്യം വെച്ച് വളരെ അധികം ആളുകള് മറ്റ് രാജ്യങ്ങളില് നിന്നും സംസ്ഥാനങ്ങളില് നിന്നും ആളുകള് തിരിച്ചു വരുന്ന സാഹചര്യം ലോക് ഡൗണ് മാറ്റുമ്പോള് ഉണ്ടായേക്കാം. അത്തരം സാഹചര്യം സമൂഹവ്യാപനം ഉണ്ടാകുന്ന രീതിയിലേക്ക് സംസ്ഥാനത്തെ തള്ളി വിടാം. മറ്റ് രാജ്യങ്ങളില് പലതും പതിനായിരക്കണക്കിന് കേസുകള് വന്നതിന് ശേഷം മാത്രം ലോക് ഡൗണ് നടപ്പിലാക്കിയപ്പോള് 500 ല് താഴെ കേസുകള് റിപ്പോര്ട്ട് ചെയ്തപ്പോള് തന്നെ ഇന്ത്യയില് സമ്പൂര്ണ ലോക് ഡൗണ് നടപ്പാക്കി. ഇത് സമൂഹവ്യാപനത്തെ ഒരു പരിധി വരെ തടഞ്ഞിട്ടുണ്ട്.
അതേസമയം സ്വകാര്യ ആശുപത്രികളിലും സര്ക്കാര് സംവിധാനങ്ങളിലും ഡോക്ടര്മാര്ക്കും മറ്റ് ആരോഗ്യ പ്രവര്ത്തകര്ക്കും നല്കി വരുന്ന പരിശീലനം തുടരേണ്ടതാണെന്നും ഐഎംഎ ചൂണ്ടിക്കാണിച്ചു. അതോടൊപ്പം ആരോഗ്യപ്രവര്ത്തകര്ക്ക് നല്കേണ്ട സുരക്ഷിത കവചങ്ങള്ക്ക് ദൗര്ലഭ്യം വരാതെ നോക്കേണ്ടതുണ്ട്. എല്ലാ മുന്കരുതലുകളും സ്വീകരിച്ച് കൊണ്ട് തന്നെ സ്വകാര്യ ക്ലിനിക്കുകളും ആശുപത്രികളും പ്രവര്ത്തനം തുടരണം.
ചെറിയ ആശുപത്രികളുടെയും ക്ലിനിക്കുകളുടെയും പ്രവര്ത്തനത്തിന് ആവശ്യമായ സംവിധാനങ്ങള് ഒരുക്കുന്നതിന് സര്ക്കാര് നടപടികളെടുക്കണമെന്നും അവര് ആവശ്യപ്പെട്ടു. പ്രായമായവര്, ഗര്ഭിണികള്, മറ്റ് ഗുരുതരരോഗമുള്ളവര് എന്നിവര്ക്ക് നല്കേണ്ട പ്രത്യേക ശ്രദ്ധ കര്ശനമായ രീതിയില് തുടരണം.കേരളത്തില് നിരീക്ഷണത്തില് ഇരിക്കുന്ന രോഗികള്ക്കും ആരോഗ്യപ്രവര്ത്തകര്ക്കും ആന്റി ബോഡി ടെസ്റ്റുകളും റാപ്പിഡ് പിസിആര് ടെസ്റ്റും കൂടുതല് വ്യാപകമാക്കണമെന്നും ഐഎംഎ കൂട്ടിച്ചേര്ത്തു.
