ന്യൂദല്ഹി: കൊറോണ വൈറസ് വ്യാപകമാകുന്ന പശ്ചാത്തലത്തില് രോഗത്തെ പ്രതിരോധിക്കാനുള്ള കേന്ദ്ര സര്ക്കാരിന്റെ പോരാട്ടത്തോട് ഒത്തുചേര്ന്ന് പ്രവര്ത്തിക്കാന് ഇന്ത്യന് സൈന്യവും സജ്ജം. കേന്ദ്രത്തെ സഹായിക്കാന് തയ്യാറാണെന്ന് പ്രതിരോധ മന്ത്രി രാജ്നാഥ് സിംഗിന്റെ അദ്ധ്യക്ഷതയില് ചേര്ന്ന വീഡിയോ കോണ്ഫറന്സില് ഇന്ത്യന് സൈന്യം വ്യക്തമാക്കി.
8000 സൈനിക ഡോക്ടര്മാര് മഹാമാരിക്കെതിരെ പോരാടാന് തയ്യാറാണ്. കൊറോണ വൈറസ് ബാധിതരെ ചികിത്സിക്കാനായി പ്രത്യേക ആശുപത്രികള് ഒരുക്കിയിട്ടുണ്ടെന്നും സംയുക്ത സൈനിക മേധാവി ബിപിന് റാവത്ത് വ്യക്തമാക്കി.
കൊറോണ കേസുകള്ക്കായി 28 ആശുപത്രികള് ആണ് കര, നാവിക, വ്യോമസേന തയ്യാറാക്കിയിരിക്കുന്നത്. കരസേനയുടെ അഞ്ച് ആശുപത്രികളില് കൊറോണ പരിശോധനാ സൗകര്യം ലഭ്യമാണ്. ആറ് ആശുപത്രികളില് കൂടി ഉടന് ഈ സൗകര്യം ലഭ്യമാക്കുമെന്നും അധികൃതര് അറിയിച്ചു.
സംയുക്ത സൈനിക മേധാവി ജനറല് ബിപിന് റാവത്ത്, കരസേനാ മേധാവി മനോജ് മുകുന്ദ് നരവാനെ, വ്യോമസേനാ മേധാവി ആര് കെ എസ് ബദൗരിയ എന്നിവരും വീഡിയോ കോണ്ഫറന്സില് പങ്കെടുത്തു.
