തിരുവനന്തപുരം: മണ്ണിട്ട് മൂടി അതിര്ത്തി അടച്ച കര്ണ്ണാടകത്തിന്റെ നടപടി അംഗീകരിക്കാനാവില്ലെന്ന് ഗവര്ണര് ആരിഫ് മുഹമ്മദ് ഖാന്. കേരളത്തിന്റെ ചരക്കു നീക്കത്തെ പ്രതിസന്ധിയിലാക്കുന്നതാണ്. രാജ്യത്തെ ചരക്ക് ഗതാഗതം തടയാനാകില്ലെന്ന പ്രധാനമന്ത്രിയുടെ പ്രഖ്യാപങ്ങളെ അട്ടിമറിക്കുന്നതാണ് കര്ണ്ണാടകത്തിന്റെ നടപടിയെന്നും ഗവര്ണര് പറഞ്ഞു.
അതിര്ത്തി അടച്ചതോടെ മംഗളൂരുവില് ചികിത്സ തേടിയിരുന്ന രോഗികളേയും ഇത് ബാധിച്ചിട്ടുണ്ട്. അടിയന്തിര ചികിത്സ ലഭിക്കാതെ രണ്ട് രോഗികള് കഴിഞ്ഞ ദിവസം മരണമടഞ്ഞിരുന്നു. മഞ്ചേശ്വരം തുമിനാട് സ്വദേശി ബേബിയും മഞ്ചേശ്വരം സ്വദേശി ശേഖറുമാണ് മരിച്ചത്. ഇരുവരും മംഗളൂരുവിലെ സ്വകാര്യ ആശുപത്രിയിലാണ് ചികിത്സ തേടിയിരുന്നത്.
കര്ണ്ണാടകത്തിന്റെ നടപടി രാഷ്ട്രപതിയുടെയും പ്രധാനമന്ത്രിയുടെയും ശ്രദ്ധയില്പ്പെടുത്തിയിട്ടുണ്ട്. ഉടന് പരിഹാരമുണ്ടാകുമെന്ന് പ്രതീക്ഷിക്കുന്നത്. അതിര്ത്തി അടച്ചത് വലിയ പ്രത്യാഘാതം ഉണ്ടാക്കുമെന്നും ഗവര്ണര് കൂട്ടിച്ചേര്ത്തു.
മാക്കൂട്ടം ചുരം റോഡ് അടച്ച നടപടി കേന്ദ്രസര്ക്കാരിന്റെ ലോക് ഡൗണ് നിയമത്തിന്റെ ലംഘനമെന്ന് ചൂണ്ടിക്കാട്ടി കണ്ണൂര് കളക്ടര് ടിവി സുഭാഷ് കര്ണാടക ഹോം സെക്രട്ടറിക്കും കത്തയച്ചു. ചരക്ക് ഗതാഗതം തടയാനാകില്ലെന്ന പ്രധാനമന്ത്രിയുടെ പ്രഖ്യാപനം കര്ണാടകം അട്ടിമറിക്കപ്പെട്ടിട്ടുണ്ട്. സംസ്ഥാനത്തെ ചരക്ക് ഗതാഗതത്തെ ഇത് പ്രതികൂലമായി ബാധിച്ചിരിക്കുകയാണ്.
ഇതോടെ അവശ്യസാധനങ്ങളുടെ വില കുതിച്ചുയര്ന്നെന്നും ബദല് പാതകള് പ്രായോഗികമല്ലെന്നും ചൂണ്ടിക്കാട്ടിയാണ് ജില്ലാ കളക്ടര് കത്തയച്ചിരിക്കുന്നത്. അതേസമയം കണ്ണൂര് ജില്ലാ ഭരണകൂടത്തിന്റെ കത്ത് ലഭിച്ച ശേഷം തുടര്നടപടി ആലോചിക്കാമെന്ന് ഹൈക്കോടതിയില് കര്ണാടകം ഉറപ്പ് നല്കിയിരുന്നു. ഹര്ജി കോടതി ഇന്ന് വീണ്ടും പരിഗണിക്കും.
