വടകര: സര്ക്കാര് പ്രഖ്യാപിച്ച സൗജന്യ റേഷന് നേരത്തെ കിട്ടണം എന്ന മണിയൂര് മീനത്തുകരയിലെ വേണുഗോപാലിന്റെ ആവശ്യം പ്രധാനമന്ത്രിയുടെ ഓഫീസില് അറിയിച്ചപ്പോള്, നാലു മണിക്കൂറിനുള്ളില് അരി വീട്ടില് എത്തിച്ചു നല്കി.
ഏപ്രില് ഒന്നുമുതല് 15 കിലോ അരി സര്ക്കാര് പ്രഖ്യാപിച്ചിരുന്നു, തനിച്ചു താമസിക്കുന്ന വേണുഗോപാലന് ലോക്ക് ഡൗണ് പ്രഖ്യാപിച്ചതുകാരണം പുറത്തിറങ്ങാന് കഴിയുന്നില്ലെന്നും ഏപ്രില് ഒന്നുമുതല് ഉള്ള അരി നേരത്തെ ലഭ്യമാക്കുമോ എന്നും സപ്ലൈ ഓഫീസില് വിളിച്ചു ചോദിച്ചെങ്കിലും സാധ്യമല്ലെന്ന മറുപടിയാണ് ലഭിച്ചത്.
നേരിട്ട് സിവില് സപ്ലൈസ് വകുപ്പ് മന്ത്രി, മുഖ്യമന്ത്രി, ചീഫ് സെക്രട്ടറി എന്നിവര്ക്ക് ഇ- മെയില് സന്ദേശം വഴിയും ഫോണ് മുഖേനയും കാര്യങ്ങള് ധരിപ്പിച്ചെങ്കിലും യാതൊരു മറുപടിയും ഉണ്ടായില്ല. ശനിയാഴ്ച ഉച്ചയ്ക്ക് പ്രധാനമന്ത്രിയുടെ ന്യൂദല്ഹിയിലെ ഓഫീസില് ബന്ധപ്പെട്ട വേണുഗോപാലിന് സംസ്ഥാനത്തെ വിവിധ മേധാവികള്ക്ക് അയച്ച എല്ലാ മെയില് സന്ദേശങ്ങളും പ്രധാനമന്ത്രിയുടെ ഓഫീസിലേക്ക് അയക്കാനും എത്ര രാത്രിയായാലും റേഷന് കട തുറന്നു സാധനങ്ങള് എത്തിച്ചു തരാമെന്നും പ്രധാനമന്ത്രിയുടെ ഓഫീസ് ഉറപ്പു ലഭിക്കുകയായിരുന്നു.
രണ്ടു മണിക്കൂറുകള്ക്കു ശേഷം രാജ്ഭവനില് നിന്നും പ്രശ്നം ഉടന് പരിഹരിക്കാമെന്നും പറഞ്ഞു ഫോണ് വന്നു. തുടര്ന്നു രാത്രി ഏഴ് മണിയോടെ അടച്ച പലയാട്ടു നടയിലെ റേഷന് കട സപ്ലൈ ഓഫീസറുടെ നിര്ദ്ദേശപ്രകാരം തുറന്നു 15 കിലോ അരി റേഷന് കടയില് നിന്നും ഓട്ടോറിക്ഷയില് വീട്ടിലെത്തിച്ചുകൊടുത്തു. കൂടാതെ അരി മുന്കൂറായി കൊടുക്കാം എന്ന നിര്ദ്ദേശവും സപ്ലൈ ഓഫിസുകളില് എത്തുകയും ചെയ്തു.
അരി നേരത്തേ ലഭ്യമാക്കിയ പ്രധാനമന്ത്രിയുടെ ഓഫിസിലേക്ക് വിളിച്ചു നന്ദി അറിയിക്കാനും വേണുഗോപാല് മറന്നില്ല.
