ന്യൂദല്ഹി: രാജ്യം പൂര്ണ്ണമായി അടച്ചിടാന് തീരുമാനിച്ചതിന്റെ പശ്ചാത്തലത്തില് സംസ്ഥാനങ്ങള്ക്കും കേന്ദ്ര ഭരണ പ്രദേശങ്ങള്ക്കും മൂന്ന് മാസത്തെ റേഷന് ധാന്യങ്ങള് മുന്കൂറായി നല്കാന് ഉത്തരവ്. രാജ്യത്ത് ഒരുവിധത്തിലും ഭക്ഷ്യക്ഷാമം ഉണ്ടാകില്ല. അതിനുള്ള കരുതല് നടപടികള് സ്വീകരിച്ചിട്ടുണ്ടെന്നും കേന്ദ്ര ധനമന്ത്രി നിര്മല സീതാരാമന് അറിയിച്ചു.
റേഷന് കടവഴിയാണ് ഭക്ഷ്യധാന്യങ്ങള് വിതരണം ചെയ്യുക. സംസ്ഥാനങ്ങളും കേന്ദ്രഭരണ പ്രദേശങ്ങളും മൂന്ന് മാസത്തേയ്ക്കുള്ള ഭക്ഷ്യധാന്യങ്ങള് മുന്കൂറായി എടുക്കാനും കേന്ദ്രം ആവശ്യപ്പെട്ടു. നിര്മ്മല സീതാരാമന് ട്വിറ്ററിലൂടെയാണ് ഇക്കാര്യം അറിയിച്ചത്. 21 ദിവസത്തേയ്ക്ക് രാജ്യത്ത് ലോക്ഡൗണ് പ്രഖ്യാപിച്ച സാഹചര്യത്തില് ജനങ്ങള്ക്ക് ഭക്ഷ്യധാന്യങ്ങളുടെ ലഭ്യത ഉറപ്പ് വരുത്തണമെന്നും കേന്ദ്രമന്ത്രി നിര്ദ്ദേശം നല്കി.
നിലവില് എല്ലാ മാസവും പൊതുവിതരണ ശാലകള് വഴി ആളുകള്ക്ക് അഞ്ച് കിലോഗ്രാം വീതം ഭക്ഷ്യധാന്യങ്ങളാണ് വിതരണം ചെയ്യുന്നത്. രാജ്യത്തൊട്ടാകെ അഞ്ച് ലക്ഷം പൊതുവിതരണ ശാലകളാണ് ഉള്ളത്. കേന്ദ്രത്തിന്റെ പുതിയ തീരുമാനത്തോടെ രാജ്യത്തെ 75 കോടി ജനങ്ങള്ക്കാണ് പ്രയോജനപ്പെടുക. നിലവിലെ കണക്ക് പ്രകാരം 435 ലക്ഷം ടണ് ഭക്ഷ്യധാന്യമാണ് കേന്ദ്രസര്ക്കാരിന്റെ പക്കലുള്ളത്. ഇതില് 272.19 ലക്ഷം ടണ് അരിയും, 162.79 ടണ് ഗോതമ്പുമാണ്.
