ന്യൂദല്ഹി: മധ്യപ്രദേശിന്റെ വികസനം മാത്രം ലക്ഷ്യമിടുന്ന ശിവരാജ് സിങ് ചൗഹാന് കഴിവും അനുഭവ സമ്പത്തുമുള്ള മികച്ച ഭരണാധികാരിയാണെന്ന് പ്രധാനമന്ത്രി നരേന്ദ്ര മോദി. മധ്യപ്രദേശ് മുഖ്യമന്ത്രിയായി സത്യപ്രതിജ്ഞ ചെയ്തതിന് പിന്നാലെ ചൗഹാനെ ട്വിറ്ററിലൂടെ അഭിനന്ദിക്കുകയായിരുന്നു പ്രധാനമന്ത്രി.
സംസ്ഥാനത്തെ പുതിയ തലത്തിലേക്ക് ഉയര്ത്തുന്നതിന് എല്ലാ ഭാവുകങ്ങളും നേരുന്നുന്നെന്നും പ്രധാനമന്ത്രി ട്വിറ്ററില് കുറിച്ചു. ഇന്ന് രാത്രി ഒന്പത് മണിയോടെയാണ് മധ്യപ്രദേശ് മുഖ്യമന്ത്രിയായി ശിവരാജ് സിംഗ് ചൗഹാന് സത്യപ്രതിജ്ഞ ചെയ്തത്. രാജ്ഭവനില് നടന്ന ചടങ്ങില് രാഷ്ട്രപതി രാം നാഥ് കോവിന്ദ് സത്യവാചകം ചൊല്ലിക്കൊടുത്തു. ഇത് നാലാം തവണയാണ് മധ്യപ്രദേശ് മുഖ്യമന്ത്രിയായി ചൗഹാന് അധികാരത്തിലേറുന്നത്. 2003 മുതല് 2018 വരെ ചൗഹാന് മധ്യപ്രദേശ് മുഖ്യമന്ത്രിയായിരുന്നു.
മുഖ്യമന്ത്രി എന്ന നിലയില് മധ്യപ്രദേശിന്റെ വികസനത്തിനായി സത്യസന്ധമായി പ്രവര്ത്തിക്കുമെന്ന് ചൗഹാന് പറഞ്ഞു. എത്രയും പെട്ടെന്ന് തന്നെ കൊറോണ വൈറസ് വ്യാപനത്തെ തടയുക എന്നതാണ് തന്റെ ലക്ഷ്യം. കൊറോണ വൈറസ് ബാധയുടെ പശ്ചാത്തലത്തില് സത്യപ്രതിജ്ഞാ ചടങ്ങ് ആഘോഷിക്കരുതെന്ന് പ്രവര്ത്തകരോട് അഭ്യര്ത്ഥിക്കുന്നു. എല്ലാവരും അവരവരുടെ വീട്ടില് തുടരണമെന്നും അദ്ദേഹം വ്യക്തമാക്കി.
