തൃശൂര്: കൊറോണ പശ്ചാത്തലത്തില് ആളുകള് കൂട്ടിച്ചേരരുതെന്ന വിലക്ക് ലംഘിച്ച് പള്ളിയില് കുര്ബാന നടത്തിയ വികാരി അറസ്റ്റില്. ചാലക്കുടി കൂടപ്പുഴ നിത്യസഹായമാത പള്ളി വികാരി ഫാദര് പോളി പടയാട്ടിയാണ് അറസ്റ്റിലായത്.വിലക്ക് ലംഘിച്ച് പള്ളിയില് നടത്തിയ കുര്ബാനയില് നൂറോളം വിശ്വാസികളാണ് പങ്കെടുത്തത്. ഇവര്ക്കെതിരെയും പോലീസ് കേസെടുത്തിട്ടുണ്ട്.
കൊറോണ ജാഗ്രതയുടേയും മുന്കരുതലിന്റെയും പശ്ചാത്തലത്തില് ആളുകൂടുന്ന ചടങ്ങുകളും പ്രാര്ത്ഥനകളും ഒഴിവാക്കണമെന്ന് സര്ക്കാരിന്റെ കര്ശന നിര്ദ്ദേശം നിലവിലുണ്ട്. സംസ്ഥാനമൊട്ടുക്ക് കര്ശന ജാഗ്രത പ്രഖ്യാപിച്ചിരിക്കെയാണ് പള്ളി വികാരിയുടെ ഈ നിയമ ലംഘനം. വിശ്വാസികള് വീടുകളില് ഇരുന്ന് പ്രാര്ത്ഥിച്ചാല് മതിയെന്നും കുര്ബാനകളില് പങ്കെടുക്കരുതെന്നും അതിരൂപതകളും നിര്ദ്ദേശിച്ചിരുന്നു.
ഇത്തരം പ്രവര്ത്തനങ്ങള് ആര് ചെയ്താലും ഒരു വിട്ടുവീഴ്ചയും വേണ്ടെന്നാണ് സംസ്ഥാന ഭരണകൂടത്തിന്റെയും നിര്ദ്ദേശം. ഇതനുസരിച്ച് കൂടിയാണ് പോലീസ് നടപടി.
