തിരുവനന്തപുരം: സംസ്ഥാനത്ത് തുടരുന്ന എല്ലാ വിദേശികളും സ്വന്തം നാടുകളിലേക്ക് തിരിച്ചു മടങ്ങണമെന്ന് സംസ്ഥാന സര്‍ക്കാര്‍. കോവിഡ് 19 വ്യാപകമാകാന്‍ തുടങ്ങിയതോടെയാണ് വിദേശികളോട് തിരിച്ചുപോകാന്‍ ആവശ്യപ്പെട്ടത്.
കേരളത്തില്‍ സന്ദര്‍ശനത്തിനായി എത്തി ഇവിടെ തങ്ങുന്ന വിദേശികള്‍ താമസസ്ഥലത്ത് നിന്നും വിമാനത്താവളത്തിലേക്ക് പോകുമ്പോഴും അവിടെ എത്തിയാലും കൊവിഡ് 19 പ്രതിരോധത്തിനുള്ള മാര്‍ഗ്ഗനിര്‍ദ്ദേശങ്ങള്‍ പാലിക്കണമെന്നും സംസ്ഥാന സര്‍ക്കാര്‍ പുറത്തിറക്കിയ പുതിയ ഉത്തരവില്‍ പറയുന്നുണ്ട്.
കഴിഞ്ഞ ദിവസം കേരളത്തില്‍ സന്ദര്‍ശനത്തിന് എത്തിയ യുകെ പൗരന് കോവിഡ് 19 സ്ഥിരീകരിച്ചിരുന്നു. അധികൃതര്‍ നല്‍കിയ മാര്‍ഗ നിര്‍ദ്ദേശങ്ങള്‍ അവഗണിച്ച് ഇയാള്‍ വിദേശത്തേക്ക് കടക്കാനും ശ്രമം നടത്തിയിരുന്നു. തുടര്‍ന്ന് വിമാനം തിരിച്ചിറക്കുകയായിരുന്നു. ഇയാള്‍ക്കൊപ്പം ഉണ്ടായിരുന്ന സംഘവും നിലവില്‍ നിരീക്ഷണത്തിലാണ്. ഇത് കൂടാതെ ആലപ്പുഴയില്‍ നിരീക്ഷണത്തിലായിരുന്ന വിദേശ പൗരന്മാരേയും കാണാതായിരുന്നു.
സംസ്ഥാനത്ത് കോവിഡ് 19 വൈറസ് ബാധ്‌ക്കെതിരെയുള്ള പ്രതിരോധ നടപടികളുടെ ഭാഗമായാണ് വിദേശികളോട് നിലവില്‍ തിരിച്ചു പോകണമെന്ന് ആവശ്യപ്പെട്ടിരിക്കുന്നത്. 5000-ത്തോളം വിദേശപൗരന്‍മാരാണ് ഇപ്പോള്‍ കേരളത്തില്‍ തങ്ങുന്നതെന്ന് പ്രിന്‍സിപ്പല്‍ സെക്രട്ടറി പുറപ്പെടുവിച്ച ഉത്തരവില്‍ പറയുന്നു. ഇവരെല്ലാം എത്രയും പെട്ടെന്ന് സ്വന്തം നാട്ടിലേക്ക് മടങ്ങിപ്പോകുന്നതിനുള്ള നടപടികള്‍ ആരംഭിക്കണം.
ലോകത്തെ 151 രാജ്യങ്ങളെ ബാധിച്ച കൊവിഡ് വൈറസ് ബാധയെ മഹാമാരിയായ ലോകാരോഗ്യസംഘടന പ്രഖ്യാപിച്ചിട്ടുണ്ടെന്നും രോഗബാധയെ തടയാന്‍ കേരളവും നിരന്തര പരിശ്രമത്തിലാണെന്നും ഇതുസംബന്ധിച്ച അറിയിപ്പില്‍ പറയുന്നു.
ചില രാജ്യങ്ങള്‍ കോവിഡ് നെഗറ്റീവ് സര്‍ട്ടിഫിക്കറ്റ് ഉള്ളവരെ മാത്രമേ സ്വന്തം രാജ്യത്ത് പ്രവേശിപ്പിക്കുന്നുള്ളൂ. ഈ രാജ്യങ്ങളിലെ പൗരന്‍മാര്‍ കൊവിഡ് ടെസ്റ്റിനായി ജില്ലകളിലെ കോവിഡ് സെല്ലുകളില്‍ ബന്ധപ്പെടണം. ജില്ല പ്രതിരോധ സെല്ലില്‍ നിന്നും സാംപിള്‍ ശേഖരണം നടത്തിയ ശേഷം ഏറ്റവും അടുത്തുള്ള സെന്ററില്‍ കൊവിഡ് 19 പരിശോധന നടത്തും. തുടര്‍ന്ന് മാര്‍ഗ്ഗനിര്‍ദേശങ്ങള്‍ക്ക് അനുസൃതമായി കൊവിഡ് നെഗറ്റീവ് സര്‍ട്ടിഫിക്കറ്റ് ലഭ്യമാക്കും. നെഗറ്റീവ് സര്‍ട്ടിഫിക്കറ്റ് ലഭിച്ചാലുടന്‍ രാജ്യം വിടാനുള്ള നടപടികള്‍ വിദേശപൗരന്‍മാര്‍ സ്വീകരിക്കമെന്നും സംസ്ഥാനം അറിയിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: