റിയാദ് : മക്കയും മദീനയുമൊഴികെയുളള പള്ളികളില്‍ പ്രാര്‍ത്ഥനകള്‍ക്ക് സൗദിയില്‍ വിലക്ക് ഏര്‍പ്പെടുത്തി. കൊറോണ വ്യാപകമായി പടരാന്‍ തുടങ്ങിയതോടെയാണ് മുസ്ലിം പള്ളികളില്‍ പ്രാര്‍ത്ഥന നടത്തുന്നതിന് കര്‍ശ്ശന വിലക്ക് ഏര്‍പ്പെടുത്തിയത്. സൗദി ഉന്നത പണ്ഡിത സഭയുടേതാണ് തീരുമാനം.
ഗള്‍ഫിലെ ആറു രാജ്യങ്ങളിലുമായി ആയിരത്തിഅറുപത്തൊന്നു പേരാണ് കേവിഡ് 19 ബാധിച്ച് ചികിത്സയില്‍ കഴിയുന്നത്. സൗദിയില്‍ ബാങ്കുകളും ധനകാര്യ സ്ഥാപനങ്ങളും അടച്ചിടാന്‍ തീരുമാനിച്ചു. ഖത്തറില്‍ മുസ്ലിം പള്ളികളടക്കമുള്ള എല്ലാ ആരാധനാലയങ്ങള്‍ അടച്ചിട്ടു. വൈറസ് വ്യാപനം തടയാനുള്ള മുന്‍കരുതലിന്റെ ഭാഗമായാണ് ഈ നിയന്ത്രണം ഏര്‍പ്പെടുത്തിയിരിക്കുന്നത്. അതേസമയം ബഹ്‌റൈനില്‍ ഓണ്‍ അറൈവല്‍ വിസ നല്‍കുന്നതിനു അനിശ്ചിതകാലത്തേക്കു വിലക്കേര്‍പ്പെടുത്തിയതായി ആഭ്യന്തരമന്ത്രാലയത്തിലെ പൗരത്വ പാസ്‌പോര്‍ട്ട് വിഭാഗം അറിയിച്ചു.
എന്നാല്‍ നയതന്ത്ര പാസ്‌പോര്‍ട്ടുള്ളവര്‍ക്കും നേരത്തേ അനുവദിച്ച വിസയുള്ളവര്‍ക്കും പ്രവേശനം അനുവദിക്കും. ബഹ്റൈനിലേക്കുള്ള വിമാനങ്ങളുടെ എണ്ണത്തില്‍ കുറവുണ്ടാകുമെന്നു വ്യോമയാന വിഭാഗവും അറിയിച്ചിട്ടുണ്ട്. യുഎഇയിലെ ബജറ്റ് എയര്‍ലൈന്‍സായ ഫ്‌ളൈ ദുബായ് ഈ മാസം മുപ്പത്തൊന്നു വരെ ഇന്ത്യയിലേയ്‌ക്കുള്ള സര്‍വീസ് നിര്‍ത്തിവച്ചു. ടിക്കറ്റ് ബുക്ക് ചെയ്തവര്‍ക്ക് യാത്ര നീട്ടിവയ്‌ക്കുകയോ റദ്ദാക്കുകയോ ചെയ്യാം.
ഈ മാസം രണ്ടിനു ശേഷം ഒമാനിലെത്തിയവരെല്ലാം നിര്‍ബന്ധമായും താമസസ്ഥലങ്ങളില്‍ ക്വാറന്റൈന് വിധേയരാകണമെന്നാണ് നിര്‍ദ്ദേശം. ഒമാന്‍ ദുബായ് ബസ് സര്‍വീസും നിര്‍ത്തലാക്കി. സര്‍ക്കാര്‍ പ്രതിരോധ നടപടികളോട് സഹകരിക്കാത്തവര്‍ക്ക് കടുത്തശിക്ഷ നല്‍കുന്ന നിയമത്തിനു കുവൈത്ത് മന്ത്രിസഭ അംഗീകാരം നല്‍കി. ആറുമാസം വരെ തടവും 30000 ദിനാര്‍ വരെ പിഴയുമായിരിക്കും ശിക്ഷ.
പ്രതികരിക്കാൻ ഇവിടെ എഴുതുക: