തിരുവനന്തപുരം: സംസ്ഥാനത്ത് രണ്ടു പുതിയ കൊവിഡ് 19 കേസുകള് കൂടി സ്ഥിരീകരിച്ചു. ഇതോടെ നിലവില് രോഗം ബാധിച്ച് സംസ്ഥാനത്ത് ചികിത്സയിലുള്ളവരുടെ എണ്ണം 21 ആയി. മൂന്നാറില് റിസോര്ട്ടില് സ്ഥാപിച്ച ബ്രിട്ടീഷ് പൗരനും സ്പെയിനില്നിന്ന് പഠനകോഴ്സ് കഴിഞ്ഞ് തിരുവനന്തപുരത്ത് എത്തിയ ഡോക്ടര്ക്കുമാണ് പുതുതായി രോഗം സ്ഥിരീകരിച്ചതെന്ന് ആരോഗ്യമന്ത്രി കെ.കെ. ശൈലജ ടീച്ചര് അറിയിച്ചു. ബ്രിട്ടീഷ് പൗരന് കളമശ്ശേരി മെഡിക്കല് കോളേജിലും ഡോക്ടര് തിരുവനന്തപുരം മെഡിക്കല് കോളേജിലും നിരീക്ഷണത്തിലാണ്.
ഇതോടെ കേരളത്തില് ഇതുവരെ രോഗബാധ സ്ഥിരീകരിച്ചവരുടെ എണ്ണം 24 ആണ്. അതില് മൂന്നുപേര് ആദ്യഘട്ടത്തില് രോഗമുക്തി നേടിയിരുന്നു. സംസ്ഥാനത്തെ വിവിധ ജില്ലകളിലായി 10,944 പേര് നിരീക്ഷണത്തിലാണ്. ഇവരില് 10,655 പേര് വീടുകളിലും, 289 പേര് ആശുപത്രികളിലും നിരീക്ഷണത്തിലാണ്. രോഗലക്ഷണങ്ങള് ഉള്ള 2147 വ്യക്തികളുടെ സാമ്പിള് പരിശോധനയ്ക്ക് അയച്ചിട്ടുണ്ട്. ഇതില് പരിശോധനാ ഫലം ലഭിച്ച 1514 സാമ്പിളുകള് നെഗറ്റിവ് ആണ്.
