തൃശൂര്: കൊറോണയുമായി ബന്ധപ്പെട്ട് വ്യാജ വാര്ത്തകള് പ്രചരിപ്പിച്ചതിന് ഡോ. ഷിനു ശ്യാമളനെതിരെ കേസെടുത്തു. പരിശോധനയ്ക്കായി എത്തിയ രോഗിക്ക് കൊറോണ ബധയെന്ന് സംശയം പ്രകടിപ്പിച്ചെങ്കിലും അടിയന്തിര നടപടി സ്വീകരിച്ചില്ല. സംഭവം റിപ്പോര്ട്ട് ചെയ്തതിനെ തുടര്ന്ന് ക്ലിനിക് ഉടമ ജോലിയില് നിന്നും പിരിച്ചുവിട്ടെന്നും തെറ്റായി വാര്ത്ത നല്കിയതിന്റെ അടിസ്ഥാനത്തിലാണ് കേസെടുത്തിരിക്കുന്നത്.
ആരോഗ്യ പ്രവര്ത്തകര്ക്കെതിരെ അപകീര്ത്തികരമായ വാര്ത്ത പ്രചരിപ്പിച്ചെന്ന് കാണിച്ച് തൃശൂര് ഡി.എം.ഒ നല്കിയ പരാതിയുടെ അടിസ്ഥാനത്തിലാണ് നടപടി. സ്വകാര്യ ക്ലിനിക് ജീവനക്കാരിയായ ഷിനു കഴിഞ്ഞ ദിവസം സമൂഹ മാധ്യമങ്ങളിലൂടെ തന്നെ സ്ഥാപന ഉടമ ജോലിയില് നിന്നും പിരിച്ചുവിട്ടതായി അറിയിക്കുകയായിരുന്നു. തുടര്ന്ന് നടത്തിയ അന്വേഷണത്തില് ഇവര് പബ്ലിസിറ്റിക് വേണ്ടി നടത്തിയ വ്യാജ പ്രചാരണങ്ങളാണ് ഇതെന്ന് കണ്ടെത്തി. തുടര്ന്ന് ഡിഎംഒ ഷിനുവിനെതിരെ നടപടി സ്വീകരിക്കുമെന്ന് അറിയിച്ചു.
കൊറോണ ലക്ഷണമുള്ള രോഗി ചികിത്സയ്ക്ക് എത്തിയത് ആരോഗ്യവകുപ്പിനെ അറിയിച്ചിട്ടും അവര് നടപടി കൈക്കൊണ്ടില്ലെന്ന് ഡോ. ഷിനു ശ്യാമളന്റെ ആരോപണം. ഖത്തറില് നിന്നെത്തിയ ആള് കടുത്ത പനിയോടെയാണ് ക്ലിനിക്കിലെത്തിയത്. വിവരം ആരോഗ്യ വകുപ്പിനെ അറിയിക്കാന് ആവര്ത്തിച്ച് ആവശ്യപ്പെട്ടിട്ടും രോഗി അത് ചെവികൊണ്ടില്ല. പിന്നീട് വിവരം ആരോഗ്യവകുപ്പിനെ അറിയിച്ചെങ്കിലും നടപടി സ്വീകരിക്കാന് വൈകിയെന്നായിരുന്നു ഷിനു ശ്യാമളന് പറഞ്ഞത്.
ക്ലിനിക്കിലെത്തിയ രോഗിക്ക് കൊറോണയുള്ളതായി സ്ഥിരീകരിച്ചാല് പിന്നെ രോഗികള് ചികിത്സയ്ക്കായി എത്തില്ലെന്ന് പറഞ്ഞ് സ്ഥാപനം ഉടമ ജോലിയില് നിന്നും പിരിച്ചുവിട്ടെന്നാണ് ഷിനു ഫേസ്ബുക്കിലൂടെ ആരോപണം ഉന്നയിച്ചത്. അതേസമയം ഈ വാര്ത്ത പുറത്തുവിട്ട 24×7 ന്യൂസ് ചാനലിനെതിരേയും നടപടി സ്വീകരിക്കുമെന്ന് തൃശൂര് ജില്ലാ കളക്ടര് എസ്. ഷാനവാസ് അറിയിച്ചു.
