ഭർത്താവ് ചെലവിന് പണം തരുന്നില്ല, മക്കൾക്ക് അമ്മയുടെ ക്രൂര മർദ്ദനം

ഇടുക്കി: വിദേശത്തുള്ള ഭര്‍ത്താവ് പണം അയച്ചുതരാത്തതിനെ തുടര്‍ന്ന് അമ്മ കുട്ടികളെ മര്‍ദ്ദിക്കുന്നതിന്റെയും അസഭ്യം പറയുന്നതിന്റെയും ദൃശ്യങ്ങള്‍ പുറത്ത്. ഇടുക്കി അണക്കരയിലാണ് സംഭവം. വിദേശത്തുള്ള അച്ഛന്‍ പണം അയച്ചുതരാറില്ലെന്ന് പറഞ്ഞാണ് അമ്മയുടെ മര്‍ദ്ദനം. അച്ഛന് അയച്ചുകൊടുക്കാന്‍ വേണ്ടി അമ്മ തന്നെ പകര്‍ത്തിയ ദൃശ്യങ്ങളാണ് ഇപ്പോള്‍ പുറത്തുവന്നത്.

അതേസമയം, വീഡിയോ ഒരു നാടകമായിരുന്നുവെന്നാണ് അമ്മയുടെ വിശദീകരണം. കുട്ടികളുടെ അച്ഛന്‍ തിരിഞ്ഞുനോക്കാറില്ല . ഗതികെട്ടാണ് ഇങ്ങനെയൊരു വീഡിയോ ചെയ്തത്. കുട്ടികളുടെ സമ്മതത്തോടെയാണ് വീഡിയോ പകര്‍ത്തിയതെന്നും അമ്മ പറയുന്നു. വീഡിയോ സമൂഹമാധ്യമങ്ങളിലൂടെ പരന്നതോടെ അച്ഛൻ 25,000 രൂപ അയച്ചു കൊടുത്തുവെന്ന് അമ്മ വ്യക്തമാക്കുന്നു. അമ്മയോടൊപ്പം കഴിയാനാണ് താത്‌പര്യമെന്ന് കുട്ടികളും അറിയിച്ചിട്ടുണ്ട്.

സംഭവം പുറത്തായതോടെ ചൈല്‍ഡ് ലൈന്‍ അന്വേഷണം ആരംഭിച്ചിട്ടുണ്ട്. അമ്മയ്‌ക്ക് എതിരെ കേസെടുക്കുമെന്ന് സിഡബ്ല്യുസിയും വ്യക്തമാക്കി. കുട്ടികളെ അമ്മ മാനസികമായി പീഡിപ്പിക്കുകയോ മർദ്ദിക്കുകയോ ചെയ്തിട്ടുണ്ടെന്ന് സംശയിക്കുന്നു.