കണ്ണൂര് : ഏഴിമല നാവിക അക്കാദമിയുടെ പരിസരത്തായി അനുമതിയില്ലാതെ ഡ്രോണ് പറത്തിയതായി പരാതി. ബുധനാഴ്ച രാവിലെ പത്ത് മണിയോടെയാണ് ഡ്രോണ് പറത്തിയത് ശ്രദ്ധയില് പെട്ടത്. ഗേറ്റിന് സമീപത്തായാണ് ഡ്രോണ് പറന്നത്.
അതീവ സുരക്ഷാ മേഖലയിലാണ് ഇത്തരത്തില് ഡ്രോണ് പറത്തിയിരിക്കുന്നത്. ഇതുസംബന്ധിച്ച് അന്വേഷണം നടത്തണമെന്ന് നാവിക അക്കാദമി ലഫ്റ്റനന്റ് കേണല് പഞ്ചാല് ബോറ ആവശ്യപ്പെട്ടു. ഇതുസംബന്ധിച്ച് പയ്യന്നൂര് പോലീസിലും പരാതി നല്കിയിട്ടുണ്ട്.
പരാതിയുടെ അടിസ്ഥാനത്തില് കണ്ണൂര് ക്രൈംബ്രാഞ്ച് ഡിവൈഎസ്പിയുടെ നേതൃത്വത്തിലുള്ള ഭീകര വിരുദ്ധ സംഘം സ്ഥലത്തെത്തി പരിശോധന നടത്തി മടങ്ങി. അതേസമയം അതീവ സുരക്ഷാ മേഖലയില് ഡ്രോണ് പറത്തിയത് ഗൗരവമായാണ് കണക്കാക്കുന്നത്. ഇതുസംബന്ധിച്ച് അന്വേഷണം ആരംഭിച്ചു കഴിഞ്ഞതായും ഡിവൈഎസ്പി അറിയിച്ചു.
