വൈക്കം: വനിതാ വില്ലേജ് ഓഫീസറെ ഓഫീസില്‍ കയറി അധിക്ഷേപിക്കുകയും അസഭ്യം പറയുകയും ചെയ്തതില്‍ സിപിഐയുടെ സര്‍വ്വീസ് സംഘടനയായ ജോയിന്റ് കൗണ്‍സില്‍ വൈക്കം മേഖലാ കമ്മിറ്റി പ്രതിഷേധിച്ചു. സിപിഎം ഓഫീസിന്റെ കെട്ടിട നികുതി കുടിശ്ശിക തീര്‍ക്കണമെന്ന് ആവശ്യപ്പെട്ട് നേട്ടീസ് അയച്ച വനിത വില്ലേജ് ഓഫീസറെ അധിക്ഷേപിക്കുകയും സ്ത്രീത്വത്തെ അപമാനിക്കുകയും ചെയ്ത സിപിഎം ലോക്കല്‍ സെക്രട്ടറി സുജിന്‍.എം നായര്‍ക്കെതിരെയാണ് പ്രതിഷേധം.
സംഭവത്തില്‍ വൈക്കം വില്ലേജ് ഓഫീസര്‍ തഹസില്‍ദാര്‍ക്ക് നല്‍കിയ പരാതിയിരുന്നു. വില്ലേജ് ഓഫീസറെയും മറ്റു ജീവനക്കാരെയും ഭീഷണിപ്പെടുത്തിയ രാഷ്‌ട്രീയ നേതാവിനെതിരെ നിയമനടപടി സ്വീകരിക്കണമെന്നാവശ്യപ്പെട്ടുകൊണ്ട് ജോയിന്റ് കൗണ്‍സിലിന്റെയും കെആര്‍ഡിഎസ്എയുടെയും സംയുക്താഭിമുഖ്യത്തില്‍ പ്രകടനം നടത്തി. വൈക്കം മിനി സിവില്‍സ്റ്റേഷനുമുന്നില്‍ നടന്ന പ്രതിഷേധയോഗം ജോയിന്റ് കൗണ്‍സില്‍ സംസ്ഥാനസമിതി അംഗം എസ്.പി സുമോദ് ഉദ്ഘാടനം ചെയ്തു.
മേഖലാ പ്രസിഡന്റ് കെ.വി ഉദയന്‍ അദ്ധ്യക്ഷനായി. ജില്ലാ കമ്മിറ്റി അംഗം കെ.പി ദേവസ്യ, മേഖലാ സെക്രട്ടറി എന്‍.സുദേവന്‍, കെ.ആര്‍.ഡി.എസ്.എ മേഖലാ പ്രസിഡന്റ് പി.ബി സാജന്‍, സെക്രട്ടറി പി.ആര്‍ ശ്യാംരാജ് എന്നിവര്‍ പ്രസംഗിച്ചു
പ്രതികരിക്കാൻ ഇവിടെ എഴുതുക: