മുംബൈ: രാജ്യവിരുദ്ധ പ്രസ്താവന നടത്തിയ ഷര്ജീല് ഇമാനിനെതിരെ നടപടി എടുത്ത കേന്ദ്ര സര്ക്കാരിനെയും ആഭ്യന്തര മന്ത്രി അമിത് ഷായെയും അഭിനന്ദിച്ച് ശിവസേന. ഷര്ജീല് രാജ്യ ദ്രോഹിയാണെന്നും ഇന്ത്യയെ വിഘടിപ്പിക്കാനാണ് ശ്രമിച്ചതെന്നും ശിവസേന മുഖപത്രം പ്രതികരിച്ചു. ഷര്ജീലിനെപ്പോലുള്ള കീടങ്ങള് ഇനിയും ഉണ്ടാകാതിരിക്കാനുള്ള ദൗത്യം കേന്ദ്രസര്ക്കാര് ഏറ്റെടുക്കണമെന്നും ശിവസേന മുഖപത്രം സാമ്നയിലെ മുഖപ്രസംഗത്തില് അഭിപ്രായപ്പെട്ടു.
ഷര്ജീലിന്റെ കൈകള് വെട്ടിയെടുത്ത ശേഷം പൊതുനിരത്തില് പ്രദര്ശിപ്പിക്കണം. ഷര്ജീല് ഇമാമിനെപ്പോലുള്ള കീടങ്ങള് ഉയര്ന്നു വരുന്നത് എത്രയും പെട്ടെന്ന് തടയാന് അമിത് ഷാ നടപടി സ്വീകരിക്കണം. അതിനായുള്ള ദൗത്യം കേന്ദ്ര സര്ക്കാര് ആരംഭിക്കണം. പൗരത്വ നിയമത്തിനിടയില് വര്ഗീയത കലര്ത്തി രാജ്യത്തെ ഭിന്നിപ്പിക്കാനാണ് ഷര്ജില് ഇമാം ശ്രമിച്ചതെന്നും സാമ്ന എഡിറ്റോറിയലില് വിവരിക്കുന്നു.
ശിവസേന മുഖപത്രത്തിന്റെ കേന്ദ്ര അനുകൂല നിലപാട് കോണ്ഗ്രസിനെ പ്രതിരോധത്തിലാക്കി. അധികാരത്തിനായി കോണ്ഗ്രസ്സിനൊപ്പം കൂടിയതോടെ ശിവസേനയില് നിന്നു പ്രവര്ത്തകര് രാജ് താക്കറെയുടെ നവനിര്മാണ് സേനയിലേക്ക് കൂടുമാറുന്നതായി റിപ്പോര്ട്ടുകള് വന്നിരുന്നു. അടുത്തിടെ പതാകയുടെ നിറം കാവിയാക്കുന്നതടക്കമുള്ള നടപടികള് സ്വീകരിച്ച് രാജ് താക്കറെ രംഗത്തു വന്നതും ശിവസേനയെ ആശങ്കപ്പെടുത്തുന്നുണ്ട്.
ഷര്ജീലിന്റേത് ഞെട്ടിക്കുന്ന ഉത്തരങ്ങളെന്ന് ദല്ഹി പോലീസ്
ന്യൂദല്ഹി: രാജ്യദ്രോഹ പരാമര്ശം നടത്തിയ സംഭവത്തില് അറസ്റ്റിലായ ജെഎന്യു മുന് വിദ്യാര്ഥി ഷര്ജീല് ഇമാം തീവ്രവാദിയെന്ന് ദല്ഹി പോലീസ്. ചോദ്യം ചെയ്തപ്പോള് ഞെട്ടിക്കുന്ന ഉത്തരങ്ങളാണ് ഷര്ജീലില് നിന്നു ലഭിച്ചതെന്ന് ദല്ഹി പോലീസ് വ്യക്തമാക്കിയതായി ദേശീയ വാര്ത്ത ഏജന്സിയായ എഎന്ഐ റിപ്പോര്ട്ട് ചെയ്തു. അസം ഉള്പ്പെടെ വടക്കു കിഴക്കന് സംസ്ഥാനങ്ങളെ ഇന്ത്യയില് നിന്നു മുറിച്ച മാറ്റണമെന്ന് താന് പ്രസംഗിച്ചിട്ടുണ്ടെന്നും വീഡിയോ വ്യാജമല്ലെന്നും ഷര്ജീല് സമ്മതിച്ചു.
ബീഹാറിലെ ജഹാനാബാദില് വച്ചാണ് ഷര്ജീലിനെ കഴിഞ്ഞ ദിവസം പോലീസ് പിടികൂടിയത്. വടക്ക് കിഴക്കന് സംസ്ഥാനങ്ങളെ ഇന്ത്യയില് നിന്ന് വേര്പ്പെടുത്തണമെന്ന ആഹ്വാനത്തെ തുടര്ന്ന് യുഎപിഎ നിയമപ്രകാരം കേസെടുത്തിരുന്നു. യുപി, ആസം, മണിപ്പൂര്, അരുണാചല് പ്രദേശ് അടക്കം അഞ്ച് സംസ്ഥാനങ്ങള് ഷര്ജീലിന്റെ പ്രസംഗത്തിനെതിരെ രാജ്യദ്രോഹ കേസ് രജിസ്റ്റര് ചെയ്തിരുന്നു.
