കൂത്തുപറമ്പ്: കോടതിയില് ഹാജരാക്കാന് കൊണ്ടുവന്ന പ്രതികള് പോലീസുകാരെ ആക്രമിച്ചു രക്ഷപ്പെടാന് ശ്രമിച്ചു. കൂത്തുപറമ്പ് ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയിലാണ് ഇന്നലെ നാടകീയമായ സംഭവങ്ങള് അരങ്ങേറിയത്.
കണ്ണൂര് സെന്ട്രല് ജയിലിലേ വാര്ഡനെ ആക്രമിച്ച കേസിലെ പ്രതികളായ കോഴിക്കോട് സ്വദേശി രാഹുല്രാജ്, മലപ്പുറം സ്വദേശി മുഹമ്മദ് ഷാഫി എന്നിവരാണ് കോടതി പരിസരത്ത്വെച്ച് പോലീസിനെ ആക്രമിച്ച് രക്ഷപ്പെടാന് ശ്രമിച്ചത്. കണ്ണൂര് സെന്ട്രല് ജയിലില് മറ്റൊരു കേസില് റിമാന്ഡില് കഴിയുമ്പോള് വാര്ഡനെ ആക്രമിച്ചു പരിക്കേല്പ്പിച്ച കേസില് പ്രതികളായിരുന്നു ഇവര് രണ്ടുപേരും. കേസില് കണ്ണൂര് ജുഡീഷ്യല് ഫസ്റ്റ് ക്ലാസ്സ് കോടതിയില് ഹാജരാക്കാന് ഇന്നലെ രാഹുല് രാജിനെ കണ്ണൂര് സെന്ട്രല് ജയിലില് നിന്നും മുഹമ്മദ് ഷാഫിയെ തൃശ്ശൂര് വിയ്യൂര് സെന്ട്രല് ജയിലില് നിന്നുമാണ് കൂത്തുപറമ്പിലെത്തിച്ചത്. കണ്ണൂര് മജിസ്ട്രേറ്റ് അവധിയിലയതിനാല് രണ്ടുപേരേയും കണ്ണൂര് മജിസ്ട്രേറ്റിന്റെ ചുമതലയിലുള്ള കൂത്തുപറമ്പ് ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയില് ഹാജരാക്കുകയായിരുന്നു.
കൂത്തുപറമ്പ് കോടതി പരിസരത്തെത്തിയപ്പോള് ഇരുവരും ശൗചാലയത്തില് പോകണമെന്ന് കൂടെ വന്ന പോലീസ് ഉദ്യോഗസ്ഥന്മാരോട് ആവശ്യപ്പെട്ടു. പോലീസുകാര് ഇവരെ ശൗചാലയത്തില് കൊണ്ടുപോകുകയും ചെയ്തു. പക്ഷെ രണ്ടുപേരും ഒരേസമയം ശൗചാലയത്തില് കയറാന് ശ്രമിച്ചപ്പോള് ഉദ്യോഗസ്ഥന്മാര് അനുവദിച്ചില്ല. ഒടുവില് ഒരാള് അകത്ത് കയറി പുറത്തേക്കിറങ്ങാന് തുടങ്ങുമ്പോള് പുറത്തുനിന്ന് മറ്റേ പ്രതി പോലീസ് ഉദ്യോഗസ്ഥരെ കല്ലുകൊണ്ട് മുഖത്ത് ഇടിക്കുകയും മതില് ചാടി രക്ഷപ്പെടാന് ശ്രമിക്കുകയും ചെയ്തു. ഉടനെ പോലീസുകാര് ഇരുവരേയും കീഴ്പ്പെടുത്തി. ഇതിനിടയില് ഉദ്യോഗസ്ഥന്മാരുടെ യൂണിഫോം പ്രതികള് വലിച്ചുകീറി.
രാഹുല് രാജിനെ കൊണ്ടുവന്ന പയ്യാവൂര് സ്റ്റേഷനിലെ പി. വിജേഷ്, പെരിങ്ങോം സ്റ്റേഷനിലെ മുഹമ്മദ് നജീബ്, ശ്രീകണ്ഠാപുരം സ്റ്റേഷനിലെ കെ.വി. ബിനീഷ്, മുഹമ്മദ് ഷാഫിയുമായി എത്തിയ തൃശ്ശൂര് എആര് ക്യാമ്പിലെ ക്ലിഫ്ടണ് സൈമണ്, മാഹി, പി.ആര്. റിനില് എന്നിവര്ക്കും പ്രതികളുടെ അക്രമത്തില് പരിക്കേറ്റു. വിവരമറിഞ്ഞ് കൂത്തുപറമ്പ് പോലീസ് കോടതി പരിസരത്തെത്തി പ്രതികളെ കസ്റ്റഡിയിലെടുത്തു. കൂത്തുപറമ്പ് ഗവണ്മെന്റ് ഹോസ്പിറ്റലില് വൈദ്യപരിശോധനയ്ക്ക് ശേഷം സ്റ്റേഷനിലെത്തിച്ചു.
പോലീസുകാരുടെ പരാതിയില് കേസ് രജിസ്റ്റര് ചെയ്തു. കൂത്തുപറമ്പ് ജുഡീഷ്യല് ഫസ്റ്റ് ക്ലാസ് മജിസ്ട്രേറ്റിന് മുമ്പില് ഹാജരാക്കി രണ്ടുപേരെയും റിമാന്ഡ് ചെയ്തു. പരിക്കേറ്റ പോലീസ് ഉേദ്യാഗസ്ഥര് കൂത്തുപറമ്പ് ഗവണ്മെന്റ് ഹോസ്പിറ്റല് ചികിത്സതേടി. പ്രതികളില് ഒരാളുടെ ചെരിപ്പില് ബ്ലേഡ് ഒളിപ്പിച്ചുവെച്ച് നിലയില് പോലീസ് കണ്ടെടുത്തു. രണ്ടുപേരും നിരവധി ക്രിമിനല് കേസുകളിലും പ്രതികളാണ്.
