തിരുവനന്തപുരം: കേരള നിയമസഭ ബജറ്റ് സമ്മേളനത്തിന് തുടക്കം കുറിക്കുന്നതിന് മുന്നോടിയായുള്ള നയപ്രഖ്യാപന പ്രസംഗത്തിനെത്തിയ ഗവര്ണര് ആരിഫ് മുഹമ്മദ് ഖാനെ തടഞ്ഞ് പ്രതിപക്ഷം. ഗോബാക്ക് വിളികളുമായി പ്രതിപക്ഷം നടുത്തളത്തിലിറങ്ങി. പ്രതിപക്ഷം ഇന്ന് നിയമസഭയില് എത്തിയത് പ്ലക്കാഡുകളുമായിട്ടാണ്. അനുനയവുമായി മുഖ്യമന്ത്രി പിണറായി വിജയനും എകെ ബാലനും രംഗത്തെത്തിയെങ്കിലും അനുനയത്തിന് പ്രതിപക്ഷം വഴങ്ങിയില്ല.
സഭയിലേക്ക് സ്പീക്കറും മുഖ്യമന്ത്രിയും ചേര്ന്ന് ആനയിച്ച ഗവര്ണറെ പ്രതിപക്ഷം ബാനറുകളും പ്ലക്കാര്ഡുമായി തടയുകയായിരുന്നു. സഭയുടെ നടുത്തളത്തിലാണ് പ്രതിപക്ഷം തടഞ്ഞത്. ഗവര്ണര്ക്കെതിരെ ‘ഗോ ബാക്ക് ‘ വിളികളും മുദ്രാവാക്യങ്ങളും പ്ലക്കാര്ഡുകളുമായി പ്രതിപക്ഷ അംഗങ്ങള് കുത്തിയിരുന്നു. ഗവര്ണര്ക്കൊപ്പം സ്പീക്കറും മുഖ്യമന്ത്രിയും ചീഫ് സെക്രട്ടറിയും ഉണ്ടായിരുന്നു. മുഖ്യമന്ത്രിയും സ്പീക്കറും പ്രതിപക്ഷത്തെ അനുനയിപ്പിക്കാന് ശ്രമിച്ചെങ്കിലും ഫലം കണ്ടില്ല. തുടര്ന്ന് വാച്ച് ആന്ഡ് വാര്ഡ് എത്തി പ്രതിപക്ഷ അംഗങ്ങളെ നീക്കി ഗവര്ണര്ക്ക് വഴിയൊരുക്കുകയായിരുന്നു. പിന്നീടു പ്രതിപക്ഷം സഭ ബഹിഷ്കരിച്ച് ഇറങ്ങിപ്പോയി.
നയപ്രഖ്യാപന പ്രസംഗത്തില് പൗരത്വ നിയമത്തിനെതിരെ വിമര്ശനമുള്ള 18-ാം പാരഗ്രാഫ് വായിക്കില്ലെന്ന് ഗവര്ണര് സംസ്ഥാന സര്ക്കാരിനെ രേഖാമൂലം അറിയിച്ചിരുന്നു. പാര്ലമെന്റ് പാസാക്കിയ നിയമത്തിനെതിരായ വിമര്ശനം സര്ക്കാരിന്റെ നയമല്ല, കാഴ്ചപ്പാട് മാത്രമാണെന്നാണ് ഗവര്ണറുടെ വിലയിരുത്തല്.
