വടകര: കമ്മ്യൂണിസം ജനാധിപത്യത്തെ നിരാകരിക്കുന്ന പ്രത്യയ ശാസ്ത്രമാണെന്ന് പ്രജ്ഞാപ്രവാഹ് ദേശീയ സംയോജകന് ജെ. നന്ദകുമാര്. വടകര പുതിയ ബസ് സ്റ്റാന്ഡ് പരിസരത്ത് ജനജാഗരണ സമിതി സംഘടിപ്പിച്ച ജനജാഗരണ സമ്മേളനത്തില് സംസാരിക്കുകയായിരുന്നു അദ്ദേഹം. കമ്മ്യൂണിസവും ജനാധിപത്യവും പരസ്പര വിരുദ്ധമാണെന്ന് ഭരണഘടന രൂപീകരണ കമ്മറ്റിയുടെ അധ്യക്ഷ ഭാഷണത്തില് ഡോ. അംബേദ്കര് വ്യക്തമാക്കി. ദീര്ഘകാലത്തെ ചര്ച്ചകള്ക്കുശേഷം പാര്ലമെന്റ് പാസ്സാക്കിയ പൗരത്വ നിയമ ഭേദഗതി തെരുവിലേക്ക് വലിച്ചിഴക്കുകയാണ്. കുപ്രചാരണത്തിനെതിരെയുള്ള വിശദീകരണങ്ങളെ തടയാന് ശ്രമിക്കുന്നു. ചര്ച്ചയെയും സംവാദത്തെയും ഭയക്കുന്നവര് കലാപം സൃഷ്ടിക്കുകയാണ്. ഭാരത വിഭജന സിദ്ധാന്തത്തിന് താത്വിക അടിത്തറ നല്കിയ പാരമ്പര്യമാണ് ഇടതുപക്ഷത്തിന്റേത്.
കോണ്ഗ്രസിന്റെ ദൗര്ലഭ്യങ്ങളെ ചൂഷണം ചെയ്ത് രാജ്യത്തെ ചില കലാശാലകള് കമ്മ്യൂണിസ്റ്റുകളും മതതീവ്രവാദികളും പങ്കിട്ടെടുത്തിരിക്കുകയാണ്. ഒരു കാലത്ത് ദേശസ്നേഹത്തിന്റെ പടനിലങ്ങള് ആയിരുന്ന ഭാരതത്തിലെ കലാലയങ്ങള് ഇന്ന് ദേശവിരുദ്ധ സാഹിത്യത്തിന്റെയും രാഷ്ട്രവിരുദ്ധ ഗൂഢാലോചനയുടെയും കേന്ദ്രങ്ങളായി മാറിയിരിക്കുകയാണ്. സത്യം ചര്ച്ച ചെയ്യുന്നതിനെ ഭയക്കുന്നത് അന്ധകാരത്തിന്റ വക്താക്കളാണെന്നും അദ്ദേഹം കൂട്ടിച്ചേര്ത്തു. ആര്എസ്എസ് വിഭാഗ് കാര്യവാഹ് എന്.കെ. ബാലകൃഷ്ണന് അധ്യക്ഷനായി. ബിജെപി ജില്ല അധ്യക്ഷന് അഡ്വ. വി.കെ. സജീവന് ആമുഖപ്രഭാഷണം നടത്തി.
