കണ്ണൂര്: കൊട്ടിയൂര് അമ്പായത്തോട് കഴിഞ്ഞ ദിവസം മാവോയിസ്റ്റുകള് പ്രകടനം നടത്തുകയും ലഘുലേഖ വിരതണം ചെയ്യുകയും ചെയ്ത പ്രദേശങ്ങളില് പോലീസും തണ്ടര്ബോള്ട്ടും പരിശോധന ശക്തമാക്കി. പ്രകടനം നടത്തിയവരെ കുറിച്ച് പോലീസിന് ഏകദേശം വിവരം ലഭിച്ചിട്ടുണ്ട്. കഴിഞ്ഞ ദിവസം പ്രകടനം നടത്തിയവര്ക്കെതിരെ യുഎപിഎ പ്രകാരമാണ് പോലീസ് കേസെടുത്തിട്ടുള്ളത്.
ലഘുലേഖ വിതരണം ചെയ്യുന്നത് ചില സിസി ടിവികളില് പതിഞ്ഞിട്ടുണ്ടെങ്കിലും ആളുകളെ തിരിച്ചറിയാന് സാധിച്ചിട്ടില്ല. കൊട്ടിയൂര് പാല്ചുരം മേഖലകളിലെ കോളനികളില് മാവോയിസ്റ്റുകള് സ്ഥിരമായി എത്താറുണ്ടെന്ന് പോലീസിന് വിവരം ലഭിച്ചിട്ടുണ്ട്.
കോളനികളിലെത്തുന്ന മാവോയിസ്റ്റുകള് ഇവിടെയുള്ളവരില് നിന്ന് അരിയും പൈസയും വാങ്ങാറുണ്ടെന്നാണ് പ്രാഥമികമായി പോലീസിന് വിവരം ലഭിച്ചിട്ടുള്ളത്. മാവോയിസ്റ്റ് സാന്നിധ്യം എന്ത് കൊണ്ട് അറിയിച്ചില്ലെന്ന ചോദ്യത്തിന് ഭയം കാരണമാണ് വിവരം പുറത്ത് പറയാതിരുന്നതെന്നാണ് കോളനികളിലുള്ളവര് പോലീസിനോട് പറഞ്ഞിട്ടുള്ളത്. എന്നാല് ഇതില് നിന്ന് വ്യത്യസ്തമായി കോളനി നിവാസികളില് ചിലരുമായി മാവോയിസ്റ്റുകള്ക്ക് ബന്ധമുള്ളതായി പോലീസ് കണ്ടെത്തിയിട്ടുണ്ട്. മാവോയിസ്റ്റുകള്ക്ക് ഇവരില് നിന്ന് സഹായം ലഭിച്ചതായും സൂചനയുണ്ട്.
നടപടി ശക്തമാക്കുമ്പോഴും കൃത്യമായ ഇടവേളകളില് പോലീസിനെ വെല്ലുവിളിച്ച് മാവോയിസ്റ്റുകള് സംഘം ചേര്ന്ന് സാന്നിധ്യം ശക്തമാക്കുന്നതാണ് അധികൃതരെ കുഴക്കുന്നത്. തണ്ടര് ബോള്ട്ട് ഉള്പ്പടെയുള്ള സംഘങ്ങളെ നിലനിര്ത്താന് ഓരോ വര്ഷവും ലക്ഷങ്ങളാണ് സര്ക്കാര് ചെലവിടുന്നത്. മലയോര മേഖലകളിലെ പോലീസ് സ്റ്റേഷനുകള്ക്കും സുരക്ഷ ഒരുക്കിയിട്ടുണ്ട്. കണ്ണൂര്, വയനാട് മലയോര മേഖലകളില് താവളമൊരുക്കുമ്പോഴും മാവോയിസ്റ്റ് സാന്നിധ്യം നിയന്ത്രിക്കാന് പോലീസിന് സാധിച്ചിട്ടില്ല.
