കൊച്ചി: പൗരത്വ നിയഭേദഗതിക്കെതിരെ പ്രമേയം പാസാക്കാനുള്ള കാസര്ഗോഡ് ജില്ലാ പഞ്ചായത്തിന്റെ നീക്കം തടഞ്ഞു ഹൈക്കോടതി. സിഎഎയ്ക്കെതിരേ പ്രമേയം അവതരിപ്പിക്കരുതെന്ന് ഹൈക്കോടതി വ്യക്തമാക്കി. മൂന്നാഴ്ചയ്ത്തേക്കാണ് പ്രമേയ അവതരണം ഹൈക്കോടതി സ്റ്റേ ചെയ്തത്. രാജ്യം പാസാക്കിയ പൗരത്വ ഭേദഗതി നിയമത്തിനെതിരേ വ്യാഴാഴ്ചയാണ് ജില്ലാ പഞ്ചായത്ത് പ്രമേയം അവതരിപ്പിക്കാനിരുന്നത്.
പൗരത്വ നിയഭേദഗതിക്കെതിരെ പ്രമേയം പാസാക്കാനുള്ള കാസര്ഗോഡ് ജില്ലാ പഞ്ചായത്തിന്റെ നീക്കം ചോദ്യം ചെയ്ത് ഹൈക്കോടതിയില് ഹര്ജിയിലാണ് ഉത്തരവ്. ബിജെപി ജില്ലാ പ്രസിഡന്റും ജില്ലാ പഞ്ചായത്തംഗവുമായ കെ.ശ്രീകാന്താണ് ഹര്ജിക്കാരന്. പാര്ലമെന്റ് പാസാക്കിയ നിയമത്തിനെതിരെ പ്രമേയം പാസാക്കല് ജില്ലാ പഞ്ചായത്തിന്റെ ഉത്തരവാദിത്തമല്ലെന്നും നിയമഭേദഗതി നടപ്പാക്കേണ്ട പഞ്ചായത്ത്, ഭേദഗതിയെ എതിര്ക്കുന്നത് നിയമവിരുദ്ധമാണന്നും ചൂണ്ടിക്കാട്ടിയാണ് ഹര്ജി. വ്യാഴാഴ്ച അവതരിപ്പിക്കുന്ന പ്രമേയാവതരണം തടയണമെന്നായിരുന്നു ഹര്ജിയിലെ ആവശ്യം. ഈ ആവശ്യമാണ് ഇപ്പോള് ഹൈക്കോടതി അംഗീകരിച്ചത്. മൂന്നാഴ്ചയ്ക്കു ശേഷം ഹര്ജിയില് തുടര്വാദങ്ങള് നടക്കും. കക്ഷികള്ക്കെല്ലാം നോട്ടീസ് അയക്കാനും കോടതി ഉത്തരവിട്ടിട്ടുണ്ട്.
