പത്തനംതിട്ട: കോന്നി സ്വദേശിനിയുടെ പുത്തന് കാറില് കല്ലുകൊണ്ടു കുത്തി വരച്ച് മലങ്കര കത്തോലിക്കാ പുരോഹിതന്റെ ധാര്ഷ്ട്യം. ഷേര്ളി ജോഷ്വായുടെ പുതിയ കാറ് മുന്നില് പാര്ക്ക് ചെയ്തതിനാല് തന്റെ വാഹനം എടുക്കാന് കഴിഞ്ഞില്ലെന്നതാണ് ഫാ. മാത്യു ന്യായമായി നിരത്തുന്നത്. സിസിടിവി ദൃശ്യങ്ങളാണ് പുരോഹിതനെ കുടുക്കിയത്. ഇതോടെ നാണക്കേട് ഭയന്ന് ബിഷപ്പ് വിഷയത്തില് ഇടപെട്ടു.
പത്തനംതിട്ട പയ്യനാമണ്ണിലെ വീട്ടു മുറ്റത്ത് നിര്ത്തിയിട്ട കാന്നി ആനക്കല്ലുക്കല് ഷേര്ളി ജോഷ്വായുടെ പുത്തന് കാറിലാണ് കഴിഞ്ഞദിവസം രാത്രി ഫാ. മാത്യു കല്ലുകൊണ്ട് കുത്തിവരച്ചത്. ഇവിടെ ഒരു റാസയില് പങ്കെടുത്ത ശേഷം തിരിച്ചു പോകാന് കാര് എടുക്കാന് കഴിയാതായതോടെയാണ് മുന്നില് കിടന്ന കാറില് കുത്തി വരച്ചതെന്നാണ് പുരോഹിതന്റെ ന്യായം. മകന് ജോജോയുടെ ഇന്ന് നടക്കുന്ന വിവാഹത്തിന് വേണ്ടി വാങ്ങിയ കാറായിരുന്നു. പയ്യനാ മണ്ണിലെ ബന്ധുവീട്ടില് എത്തിയ ഷേര്ളി വീട്ടു മുറ്റത്ത് കാര് പാര്ക്ക് ചെയ്തു. പുരോഹിതനും ബന്ധുവീടിന്റെ മുറ്റത്താണ് കാര് പാര്ക്ക് ചെയ്തിരുന്നത്.
ചുവപ്പ് കാറിന് മുന്നിലെത്തി കുനിഞ്ഞ് കല്ലെടുത്ത് ബോണറ്റില് വരയ്ക്കുന്നതും അതിന് ശേഷം ആരെങ്കിലും കാണുന്നുണ്ടോ എന്ന് നോക്കി ളോഹ വലിച്ചു പൊക്കി പിന്നിലുള്ള സ്വന്തം കാറിലേക്ക് പുരോഹിതന് ഓടുന്നതും സിസിടിവിയില് പതിഞ്ഞിരുന്നു. ദൃശ്യങ്ങള് സാമൂഹ്യ മാധ്യമങ്ങളില് പോസ്റ്റു ചെയ്യുകയും ചെയ്തു. ദൃശ്യങ്ങള് വൈറലായി മാറിയതോടെയാണ് വിഷയത്തില് സഭ ഇടപെട്ടത്.
നശിപ്പിക്കപ്പെട്ട കാര് എടുത്ത് പകരം അതേ മോഡലിലുള്ള പുതിയ കാര് വാങ്ങിക്കൊടുക്കാമെന്നും വിവാഹാവശ്യത്തിന് മറ്റൊരു കാര് വിട്ടുതരാമെന്നും ബിഷപ്പ് കുടുംബത്തിന് ഉറപ്പ് നല്കി. പകരം പരാതി പിന്വലിക്കണമെന്നും സാമൂഹ്യ മാധ്യമങ്ങളില് നിന്നും ദൃശ്യങ്ങള് എടുത്തുമാറ്റണമെന്നുമാണ് ആവശ്യം. പരാതി പിന്വലിച്ച കുടുംബം പ്രശ്നം ഒത്തുതീര്പ്പാക്കുകയും ചെയ്തു. ഷേര്ളി പുരോഹിതനെതിരേ പോലീസില് പരാതി നല്കിയതോടെയാണ് പ്രശ്നം വഷളായി മാറിയത്. ഇതോടെ സഭാ നേതൃത്വം ഇടപെടുകയായിരുന്നു.
