ന്യൂദല്ഹി: ചന്ദ്രയാന്-2 ദൗത്യം പരാജയപ്പെട്ട രാത്രിയില് താന് ഉറങ്ങിയിട്ടില്ലെന്ന് പ്രധാനമന്ത്രി നരേന്ദ്രമോദി. ദല്ഹിയിലെ തല്ക്കത്തോറ സ്റ്റേഡിയത്തില് നടന്ന പരീക്ഷാ പേ ചര്ച്ചയില് വിദ്യാര്ഥികളെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
ചന്ദ്രയാന്-2 ദൗത്യം പരാജയപ്പെട്ട രാത്രിയില് താന് ഉറങ്ങിയിട്ടില്ല. വിജയിക്കുമെന്ന് ഉറപ്പില്ലാത്തതിനാല് ചന്ദ്രയാന്-2 ദൗത്യം കാണാന് പോകരുതെന്ന് തന്നോട് ചിലര് പറഞ്ഞിരുന്നു. ഇതാണ് കാരണമെങ്കില് താന് ഐഎസ്ആര്ഒയില് സന്ദര്ശനം നടത്തുമെന്ന മറുപടിയാണ് താന് അവര്ക്ക് നല്കിയെന്നും പ്രധാനമന്ത്രി വെളിപ്പെടുത്തി.
വിക്രം ലാന്ഡറിന്റെ ബന്ധം വിച്ഛേദിക്കപ്പെട്ടെന്ന് ഉറപ്പായതിന് ശേഷമാണ് താന് ഹോട്ടലിലേക്ക് തിരിച്ചത്. എന്നാല് ദൗത്യം വിജയിക്കാത്തതില് തനിക്ക് ഒരു ദു:ഖവുമുണ്ടായില്ല. ഐഎസ്ആര്ഒ ഉദ്യോഗസ്ഥരെ മുറിയിലേക്ക് വിളിപ്പിക്കുകയും അടുത്ത ദിവസം രാവിലെ ഉദ്യോഗസ്ഥരുമായി ഒരു യോഗം ചേരാന് സമയം നിശ്ചയിക്കുകയും ചെയ്തെന്ന് മോദിജി പറഞ്ഞു.
എനിക്ക് സമാധാനത്തോടെ ഇരിക്കാന് കഴിഞ്ഞില്ല. ഞാന് പിഎംഒ ടീമിനെ വിളിച്ച് ഷെഡ്യൂള് മാറ്റി. പിറ്റേന്ന് അതിരാവിലെ ഞാന് ശാസ്ത്രജ്ഞരെ കണ്ടു. എന്റെ വികാരങ്ങള് അവരുമായി പങ്കുവെക്കുകയും അവരുടെ ശ്രമങ്ങളെ പ്രശംസിക്കുകയും ചെയ്തു, പ്രധാനമന്ത്രി പറഞ്ഞു.
ശാസ്ത്രജ്ഞരെ കണ്ട് താന് അവരെ അഭിനന്ദിച്ചപ്പോള് രാജ്യത്തിന്റെ മാനസികാവസ്ഥ തന്നെ മാറി. ഈ സംഭവം നമ്മളെ പഠിപ്പിക്കുന്നത് പരാജയങ്ങളില് നിന്ന് പോലും വിജയത്തിന്റെ പാഠങ്ങള് പഠിക്കാന് നമുക്ക് കഴിയുമെന്നാണ്.
”നാളെ ഒരു പുതിയ പ്രഭാതവും തിളക്കവും ഉണ്ടാകും”. ചന്ദ്രയാന്-2 ദൗത്യത്തിന് പിന്നിലുള്ളവരെ പ്രോത്സാഹിപ്പിച്ചുകൊണ്ട് പ്രധാനമന്ത്രി മോദി പറഞ്ഞു.
വിക്രം ലാന്ഡര് ചന്ദ്രനില് നിന്ന് 2.1 കിലോമീറ്റര് അകലെയായിരുന്നപ്പോള് സമ്പര്ക്കം നഷ്ടപ്പെട്ടതിനെ കുറിച്ചും മോദിജി ശാസ്ത്രജ്ഞരോട് വിവരിച്ചു. ദൗത്യം ചന്ദ്രന്റെ ഉപരിതലത്തിലെത്തിയിരിക്കില്ല. പക്ഷേ ഒരു കവി ഈ അവസ്ഥയെ വിവരിക്കുകയാണെങ്കില്, ‘ചന്ദ്രയാന്-2 ചന്ദ്രനെ കാണാനുള്ള തിരക്കിലായിരുന്നെന്നും അതിനാല് അത് അവിടേക്ക് ഇടിച്ചു കയറുകയായിരുന്നു’. എന്നാകും പറയുകയെന്നും മോദിജി വ്യക്തമാക്കി. പ്രധാനമന്ത്രിയുടെ ഈ വാക്കുകള് ശാസ്ത്രജ്ഞരെ മാത്രമല്ല, രാജ്യത്തെ മുഴുവന് ഉത്തേജിപ്പിക്കാന് പോന്നതായിരുന്നു.
