ന്യൂദല്ഹി: പൗരത്വ നിയമ ഭേദഗതിക്കെതിരായ പ്രതിഷേധത്തില് പ്രതിപക്ഷ പാര്ട്ടികളിലെ ഭിന്നത രൂക്ഷമായി. കോണ്ഗ്രസിന്റെയും ഇടതുപാര്ട്ടികളുടേയും ഇരട്ടത്താപ്പ് പ്രോത്സാഹിപ്പിക്കാനാവില്ലെന്നും വൃത്തികെട്ട രാഷ്ട്രീയമാണ് അവര് കളിക്കുന്നതെന്നും തൃണമൂല് നേതാവും ബംഗാള് മുഖ്യമന്ത്രിയുമായ മമതാ ബാനര്ജി ആരോപിച്ചു. ബംഗാളില് കോണ്ഗ്രസ്-ഇടതുപാര്ട്ടികള് നടത്തിയ അക്രമങ്ങളാണ് മമതാ ബാനര്ജിയെ ചൊടിപ്പിച്ചത്.
ഇനി യോജിച്ച സമരത്തിനില്ലെന്നും തൃണമൂല് കോണ്ഗ്രസ് ഒറ്റയ്ക്ക് സമരം ചെയ്യുമെന്നും മമത ബംഗാള് നിയമസഭയില് അറിയിച്ചു. പൗരത്വ നിയമ ഭേദഗതിക്കെതിരായ പ്രതിഷേധങ്ങളുടെ ഏകോപനത്തിനായി കോണ്ഗ്രസ് അധ്യക്ഷ സോണിയ വിളിച്ച പ്രതിപക്ഷ പാര്ട്ടികളുടെ യോഗത്തില് പങ്കെടുക്കില്ലെന്നും മമതാ ബാനര്ജി വ്യക്തമാക്കി. ജനുവരി 13ന് ദല്ഹിയിലാണ് പ്രതിപക്ഷ യോഗം വിളിച്ചത്.
പൗരത്വ നിയമ ഭേദഗതിക്കെതിരെ രാജ്യത്ത് ആദ്യമായി പ്രക്ഷോഭം ആരംഭിച്ചത് ഞാനാണ്. എന്നാല് പൗരത്വ നിയമ ഭേദഗതിയുടേയും ദേശീയ പൗരത്വ രജിസ്റ്ററിന്റേയും പേരില് ഇടതുപാര്ട്ടികളും കോണ്ഗ്രസും നടത്തുന്നത് പ്രക്ഷോഭമല്ല അക്രമമാണ്. രാഷ്ട്രീയ അസ്തിത്വമില്ലാത്തവരാണ് പണിമുടക്കുന്നത്, മമത പറഞ്ഞു.
ദേശീയ പണിമുടക്ക് ദിനം മാള്ഡയിലെ സുജാപൂരിലടക്കം നിരവധി ഇടങ്ങളില് പണിമുടക്കിയ ഇടതു തൊഴിലാളി സംഘടനകളും തൃണമൂല് പ്രവര്ത്തകരും തമ്മില് വലിയ തോതില് ഏറ്റുമുട്ടിയിരുന്നു. ഇതിന്റെ പേരിലുള്ള ഭിന്നതയാണ് മമതയെ പ്രതിപക്ഷ സമരത്തില് നിന്ന് പിന്നോട്ട് പോകാന് പ്രേരിപ്പിക്കുന്നതെന്നാണ് പറയുന്നതെങ്കിലും പൗരത്വ നിയമ ഭേദഗതി പ്രതിഷേധങ്ങള് ബംഗാളിലെ വോട്ട് ബാങ്കിനെ ബാധിച്ചെന്നാണ് തൃണമൂല് വിലയിരുത്തല്.
