കണ്ണൂര്: എസ്എഫ്ഐയുടെ ഊരുവിലക്ക് കാരണം കോളേജില് ഹാജരാകാന് സാധിക്കാത്ത പ്രിന്സിപ്പാള്ക്കെതിരെ കുട്ടികളുടെ പരാതി എഴുതിവാങ്ങി അന്വേഷണത്തിന് ഉത്തരവിട്ട സര്വ്വകലാശാല അധികൃതര്ക്കെതിരെ ഗവര്ണര്ക്ക് പരാതി. കുത്തുപറമ്പ് എംഇഎസ് കോളേജിലെ പ്രിന്സിപ്പല് പ്രൊഫ. എന്. യുസുഫ് ആണ് സ്റ്റുഡന്റസ് സര്വീസ് ഡയറക്ടര് പ്രിയാ വര്ഗീസിനെതിരെ ഗവര്ണര്ക്ക് പരാതി നല്കിയത്.
കഴിഞ്ഞ ഡിസംബര് 9 മുതല് പ്രിന്സിപ്പല് യുസുഫിനെ കോളേജിലെത്താന് അനുവദിക്കാതെ അകാരണമായി എസ്എഫ്ഐ അനിശ്ചിതകാല ഉപരോധ സമരം നടത്തിവരികയാണ്. ഇത് കണക്കിലെടുക്കാതെയാണ് അദ്ദേഹത്തിനെതിരെ സര്വ്വകലാശാല അന്വേഷണത്തിന് ഉത്തരവിടുകയും കുട്ടികളില് നിന്നും അദ്ദേഹത്തിനെതിരെ വ്യാജപരാതി എഴുതി വാങ്ങുകയും ചെയ്തത്. പരാതിയുടെ കോപ്പി വൈസ് ചാന്സലര്ക്കും നല്കിയിട്ടുണ്ട്.
പ്രിന്സിപ്പല് തല്സ്ഥാനത്ത് തുടരാന് യോഗ്യനല്ലെന്ന് വരുത്തിത്തീര്ത്ത് തല്സ്ഥാനത്തു നിന്ന് പുറത്താക്കാനുള്ള സമരക്കാരായ എസ്എഫ്ഐ വിദ്യാര്ത്ഥികളുടെ ആവശ്യത്തെ പിന്തുണക്കാനാണ് സ്റ്റുഡന്റസ് സര്വീസ് ഡയറക്ടര് ശ്രമിക്കുന്നതെന്നും സമരം കാരണം പ്രിന്സിപ്പല് അവധിയിലായിരിക്കുന്ന സമയം നോക്കി തിടുക്കത്തില് അന്വേഷണം നടത്തുകയാണെന്നും പ്രിന്സിപ്പല് യുസുഫ് ആരോപിച്ചു.
തന്റെ രാഷ്ട്രീയ യുവയജമാനന്മാരെ തൃപ്തിപ്പെടുത്തത്താനാണ് അവര് ശ്രമിക്കുന്നതെന്ന് പ്രിന്സിപ്പല് പരാതിയില് ചൂണ്ടിക്കാട്ടി. ചാന്സലര് കൂടിയായ ഗവര്ണര് അടിയന്തരമായി പ്രശ്നത്തില് ഇടപെടുമെന്നും അദ്ദേഹത്തില് നിന്ന് നീതി ലഭിക്കുമെന്ന് ശുഭ പ്രതീക്ഷയുണ്ടെന്നും പ്രിന്സിപ്പല് പറഞ്ഞു.
