സഹകരണ ബാങ്കിലെ അഴിമതി; കുറ്റക്കാരെ സംരക്ഷിക്കുന്നത് സിപിഎം ജില്ലാ സെക്രട്ടറിയെന്ന് ആരോപണം

കോട്ടയം: വൈക്കം വെള്ളൂര്‍ സര്‍വീസ് സഹകരണ ബാങ്കില്‍ അഴിമതികാട്ടിയ ഭരണസമിതി അംഗങ്ങളെയും ജീവനക്കാരെയും സംരക്ഷിക്കുന്നത് സിപിഎം കോട്ടയം ജില്ലാ സെക്രട്ടറി വി.എന്‍.വാസവനാണെന്ന ആരോപണം ശക്തമാകുന്നു. പാര്‍ട്ടിയില്‍ വി.എന്‍. വാസവന്റെ ഗ്രൂപ്പില്‍പ്പെട്ടവരാണ് അഴിമതി നടത്തിയ സിപിഎം നേതാക്കള്‍ എന്നതും ആരോപണത്തിന് മൂര്‍ച്ച കൂട്ടുന്നു.

സഹകരണ വകുപ്പ് 65 പ്രകാരം നടത്തിയ വകുപ്പ്തല അന്വേഷണത്തിലാണ് വെള്ളൂര്‍ സര്‍വ്വീസ് സഹകരണ ബാങ്കിലെ 39.47 കോടിയുടെ അഴിമതി കണ്ടെത്തിയത്. 2019 ഫബ്രുവരി 13ന് നടത്തിയ 68(1) പ്രകാരമുള്ള വകുപ്പ്തല അന്വേഷണത്തില്‍ 43.96 കോടിയുടെ അഴിമതിയും ക്രമക്കേടും കണ്ടെത്തി. എന്നാല്‍ അഴിമതി നടത്തിയ സിപിഎം നേതാക്കള്‍ക്കെതിരെ സഹകരണ വകുപ്പ്പ്രകാരമുള്ള നടപടിയെടുത്തിട്ടില്ല. 

 ജനങ്ങളുടെ കണ്ണില്‍പൊടിയിടാന്‍ 2018 മാര്‍ച്ച് 11ന് വൈക്കം കോടതിയില്‍ കേസ് ഫയല്‍ ചെയ്‌തെങ്കിലും പോലീസ് പത്തു മാസത്തോളം കോടതിയില്‍ റിപ്പോര്‍ട്ട് കൊടുക്കാതെ താമസിപ്പിച്ചു. സെക്രട്ടറി എസ്.ജി. ധനഞ്ജയനെ മാത്രമാണ് അറസ്റ്റ് ചെയ്തത്. എന്നാല്‍ ഈ അഴിമതിക്കും ക്രമക്കേടിനും ചുക്കാന്‍ പിടിച്ച അക്കൗണ്ടന്റ് ഹരിദാസ് എ.കെയ്‌ക്ക് സെക്രട്ടിറിയുടെ ഉത്തരവാദിത്വം നല്‍കുകയും സംഭവം വിവാദമായതോടെ ബ്രാഞ്ചിലേക്ക് മാറ്റുകയും ചെയ്തു. അഴിമതി കാണിച്ച 29 ഭരണസമിതി അംഗങ്ങളില്‍ നിന്നും ജീവനക്കാരില്‍ നിന്നും 43.96 കോടിരൂപ ഈടാക്കാനാണ് അന്വേഷണ റിപ്പോര്‍ട്ട്. എന്നാല്‍ ഇതുവരെ അതിനുള്ള യാതൊരു നടപടിയും സഹകരണ വകുപ്പ് ചെയ്തിട്ടില്ല. 

സിപിഎം ജില്ലാ സെക്രട്ടറി വി.എന്‍. വാസവനാണ് ഇവരെ സംരക്ഷിക്കുന്നതെന്നാണ് സഹകാരികളും പാര്‍ട്ടിയില്‍ വാസവനെ എതിര്‍ക്കുന്നവരും ആരോപിക്കുന്നത്. വി.എന്‍.വാസവന്റെ അടുത്ത അനുയായിയായ ഇ.എം.കുഞ്ഞുമുഹമ്മദ് അടയ്‌ക്കേണ്ടത് 4.34 കോടിരൂപയാണ്. അഴിമതിക്കാര്‍ക്കെതിരെ നടപടി ആവശ്യപ്പെട്ട് സംരക്ഷണ സമിതി ഹൈക്കോടതിയെ സമീപിച്ചിരിക്കുകയാണ്. അഴിമതിക്കാരില്‍ നിന്നും തുക ഈടാക്കണമെന്ന് അഴിമതി പുറത്തുകൊണ്ടുവന്ന ബിജെപി നേതാവ് പി.ജി. ബിജുകുമാര്‍ ആവശ്യപ്പെട്ടു.

എഴുപതു കോടിയിലേറെ നിക്ഷേപമുള്ള ഈ ബാങ്കില്‍ ഡിപ്പോസിറ്റ് തുക തിരികെ നല്‍കുന്നതിലും വിവേചനമുണ്ടെന്ന ആരോപണവും ശക്തമാണ്. സിപിഎംകാര്‍ക്കും അനുഭാവികള്‍ക്കും മാത്രമാണ് ഡിപ്പോസിറ്റ് തിരികെ നല്‍കുന്നത്. സാധാരണക്കാരും പെന്‍ഷന്‍കാരും മകളുടെ വിവാഹം നടത്താന്‍ വസ്തുവിറ്റു പണം നിക്ഷേപിച്ചവരുംപണം തിരികെ കിട്ടാതെ വിഷമിക്കുകയാണ്. 

ഡിപ്പോസിറ്റ് തുക തിരികെ ലഭിക്കാതെ വിവാഹം മുടങ്ങിയ സംഭവവും ഉണ്ടായിട്ടുണ്ട്. സഹകരണ ബാങ്കിലേക്ക് തെരഞ്ഞെടുപ്പ് നടന്നെങ്കിലും പതിനായിരത്തിനടുത്ത് അംഗങ്ങളുള്ള ബാങ്കില്‍ വോട്ട് ചെയ്തത് 2900 പേര്‍മാത്രമാണ്. ഒരു വിഭാഗം സിപിഎം അംഗങ്ങള്‍ തെരഞ്ഞെടുപ്പ് ബഹിഷ്‌കരിക്കുകയായിരുന്നു.