മുംബൈ: മഹാരാഷ്ട്ര മഹാ വികാസ് അഖാഡി സഖ്യ സര്ക്കാരിന്റെ മന്ത്രിസഭാ വികസനവും വകുപ്പ് വിഭജനവും പൂര്ത്തിയായിട്ടും ഭിന്നത തുടരുന്നു. മന്ത്രിസഭാ വികസനത്തില് അതൃപ്തി രേഖപ്പെടുത്തി കോണ്ഗ്രസ് എംഎല്എ കൈലാഷ് ഗൊരന്ത്യാല് രാജിവച്ചു. പാര്ട്ടിയിലെ സ്ഥാനങ്ങളും ഇദ്ദേഹം രാജിവച്ചിട്ടുണ്ട്.
മോദി തരംഗം അലയടിച്ചുകൊണ്ടിരുന്ന സമയത്തും കോണ്ഗ്രസിന് വേണ്ടി മത്സരിച്ച് ജയിച്ചെന്നും മൂന്നാം തവണയാണ് മന്ത്രിസ്ഥാനം നിഷേധിക്കുന്നതെന്നും കൈലാഷ് പറഞ്ഞു. പാര്ട്ടിയുടെ എല്ലാ പദവികളില് നിന്ന് രാജിവയ്ക്കുന്നതായി കൈലാഷും അണികളും മഹാരാഷ്ട്ര കോണ്ഗ്രസ് പ്രസിഡന്റിന് നല്കിയ കത്തില് വ്യക്തമാക്കിയിട്ടുണ്ട്. വകുപ്പ് വിഭജനത്തെ ചൊല്ലി കഴിഞ്ഞ ദിവസം രാജിവച്ച ശിവസേന മന്ത്രി അബ്ദുള് സത്താറുമായി മുഖ്യമന്ത്രി ഉദ്ധവ് താക്കറെ ചര്ച്ച നടത്തി.
അജിത് പവാറിന് ധനകാര്യം
അതേസമയം, വകുപ്പ് വിഭജനം പൂര്ത്തിയായപ്പോള് നേട്ടം എന്സിപിക്ക്. ധനകാര്യം, ആഭ്യന്തരം തുടങ്ങി പ്രധാന വകുപ്പുകളെല്ലാം എന്സിപി കൈയടക്കി. കോണ്ഗ്രസും നേട്ടമുണ്ടാക്കിയപ്പോള് ശിവസനേയ്ക്ക് വലിയ വകുപ്പുകളൊന്നും ലഭിച്ചില്ല.ഉപമുഖ്യമന്ത്രിയും എന്സിപി നേതാവുമായ അജിത് പവാറിനാണ് ധനകാര്യം. ഉദ്ധവിന്റെ മകന് ആദിത്യ താക്കറെയ്ക്ക് പരിസ്ഥിതി, വിനോദ സഞ്ചാരം വകുപ്പുകള് ലഭിച്ചു.
പൊതുഭരണം, ക്രമസമാധാനം, വിവര സാങ്കേതികം-പൊതുജന സമ്പര്ക്കം തുടങ്ങി വകുപ്പുകളുടെ ചുമതലയാണ് ഉദ്ധവിന്. ആഭ്യന്തരം-അനില് ദേശ്മുഖ് (എന്സിപി), നഗര വികസനം-ഏക്നാഥ് ഷിന്ഡെ (ശിവസേന), ജലവിഭവം-ജയന്ത് പാട്ടീല് (എന്സിപി), റവന്യു-ബാലസാഹെബ് തൊറാത് (കോണ്ഗ്രസ്), പൊതുമരാമത്ത്-അശാക് ചവാന് (കോണ്ഗ്രസ്), ഭക്ഷ്യവിതരണം-ഛഗന് ഭുജ്ബല് (എന്സിപി), ന്യൂനപക്ഷം-നവാബ് മാലിക് (എന്സിപി), വിദ്യാഭ്യാസം-വര്ഷ ഗെയ്ക്വാഡ് (കോണ്ഗ്രസ്), വ്യവസായം, ഖനനം, ഭാഷ-സുഭാഷ് ദേശായ് (ശിവസേന), ഗതാഗതം-അനില് പരബ് (ശിവസേന), വനം-സഞ്ജയ് റാത്തോഡ് (ശിവസേന), ഉന്നത-സാങ്കേതിക വിദ്യാഭ്യാസം-ഉദയ് സാമന്ത് (ശിവസേന) എന്നിവര്ക്ക് മറ്റ് പ്രധാന വകുപ്പ്.
