ന്യൂദല്ഹി: രാജ്യസുരക്ഷയെ മുന് നിര്ത്തി കേന്ദ്ര സര്ക്കാര് കൊണ്ടുവന്ന പൗരത്വ നിയമ ഭേദഗതിയെക്കുറിച്ച് രണ്ടാം ഘട്ടത്തില് വീടുകള് തോറും കയറിയിറങ്ങി വിശദീകരിക്കാന് ബിജെപി. മറ്റെന്നാള് തുടങ്ങുന്ന പ്രചാരണ പരിപാടിയില് മൂന്നു കോടി കുടുംബങ്ങളെ നേരില്ക്കണ്ട് ആശയവിനമയം നടത്തും. കേന്ദ്ര ആഭ്യന്തരമന്ത്രി അമിത് ഷാ ഡല്ഹിയിലും പ്രതിരോധമന്ത്രി രാജ്നാഥ് സിങ് ലക്നൗവില് നിന്നും പ്രചാരണത്തിന് തുടക്കമിടും. കേരളത്തിലെ പ്രചരണ പരിപാടിക്ക് തിരുവനന്തപുരത്ത് കേന്ദ്ര കായിക മന്ത്രി കിരണ് റിജ്ജു നേതൃത്വം നല്കും.
രാജ്യവ്യാപക പ്രചരണത്തിന്റെ ഭാഗമായി രാജ്യമെമ്പാടും 1000 റാലികള് ബിജെപി നടത്തികൊണ്ടിരിക്കുകയാണിപ്പോള്. പൗരത്വ ഭേദഗതി നിയമത്തെ വിശദീകരിച്ചുകൊണ്ട് 250 ലധികം സ്ഥലങ്ങളില് വാര്ത്താസമ്മേളനങ്ങളും നടത്തുന്നുണ്ട്. എല്ലാ കുടുംബങ്ങളില് പൗരത്വ നിയമ ഭേദഗതിയെപ്പറ്റിയുള്ള നിലപാടുകള് എത്തിക്കുക എന്നതാണ് പുതിയ പ്രചരണത്തിന്റെ ലക്ഷ്യം. സമ്പര്ക്ക് അഭിയാന് എന്നാണ് ബിജെപിയുടെ പത്തു ദിവസത്തെ പ്രചാരണ പരിപാടിക്ക് പേരിട്ടിരിക്കുന്നത്.
ബിജെപിയുടെ എല്ലാ സോഷ്യല് മീഡിയ നെറ്റ്വര്ക്കുകളിലൂടെയും ജനങ്ങളെ ബോധവന്മാരാക്കുന്നുണ്ട്. എല്ലാ സംസ്ഥാനങ്ങിലെയുംബിജെപിയുടെ ട്വിറ്റര്, ഫേസ്ബുക്ക് യൂട്യൂബ് അക്കൗണ്ടിലടക്കം പ്രചാരണപ്രവര്ത്തനങ്ങളും വീഡിയോകളും പ്രസിദ്ധീകരിച്ച് തുടങ്ങിയിട്ടുണ്ട്.
