തിരുവനന്തപുരം: ലഹരിയെന്ന വിപത്തിനെതിരെ ‘ലഹരിയോട് നോ പറയാം’ എന്ന സമൂഹ മാധ്യമ പ്രചാരണത്തിലൂടെ സംസ്ഥാന സര്‍ക്കാര്‍ പുതുവത്സരത്തെ വരവേല്‍ക്കുന്നു. എക്സൈസ് വകുപ്പും അതിനു കീഴില്‍ പ്രവര്‍ത്തിക്കുന്ന ലഹരി വര്‍ജ്ജന മിഷനായ വിമുക്തിയും സംയുക്തമായാണ് ഈ പ്രചാരണത്തിന് നേതൃത്വം നല്‍കുന്നത്.
‘നാളെത്തെ കേരളം ലഹരിമുക്ത നവകേരളം’ എന്ന പ്രമേയത്തിലൂന്നിയ പ്രചാരണത്തിന്റെ ഭാഗമായി ചൊവ്വാഴ്ച വൈകുന്നേരം മുഖ്യമന്ത്രി ശ്രീ പിണറായി വിജയന്റെ ഫെയ്സ്ബുക്ക് കവര്‍ പേജ് മാറ്റി ചിട്ടപ്പെടുത്തി. “പുതുവത്സര ദിനത്തിന് മുന്നോടിയായി കവര്‍ ഫോട്ടോ ലഹരി വിരുദ്ധ സന്ദേശമായി മാറ്റം വരുത്തുകയാണ്. എല്ലാവരും ഇതുമായി സഹകരിച്ച് വിമുക്തി ലഹരി വിരുദ്ധ പ്രചരണത്തിന്റെ ഭാഗമാകണം എന്ന് മുഖ്യമന്ത്രി പിണറായി വിജയന്‍, തന്റെ ഫെയ്സ്ബുക്ക് പേജിലൂടെ അഭ്യര്‍ത്ഥിച്ചു. ഈ ക്യാമ്പയിന് ഓരോ ആളിന്റെയും പ്രയത്നവും പിന്തുണയും സര്‍ക്കാരിനോടൊപ്പമുണ്ടാകുമെന്ന് അദ്ദേഹം പ്രത്യാശിച്ചു.”
സംസ്ഥാനത്തെ മറ്റു മന്ത്രിമാരുടേയും ഉന്നത ഉദ്യോഗസ്ഥരുടേയും പ്രമുഖരുടേയും ഫെയ്സ് ബുക്ക് കവര്‍പേജുകളും ഇത്തരത്തില്‍ സജ്ജമാക്കും. പൊതുജനങ്ങള്‍ക്കും ഇത്തരത്തില്‍ തങ്ങളുടെ കവര്‍പേജുകള്‍ ചിട്ടപ്പെടുത്തി പ്രതിബദ്ധതയോടുള്ള ഈ ദൗത്യത്തില്‍ അണിചേരാവുന്നതാണ്. സംസ്ഥാന എക്സൈസ് വകുപ്പിന്റെ കീഴില്‍ മദ്യവര്‍ജ്ജനവും മയക്കുമരുന്നുകളുടെ ഉപയോഗ നിവാരണവും ലക്ഷ്യമിട്ടാണ് വിമുക്തി എന്ന ബോധവല്‍ക്കരണ മിഷന് സര്‍ക്കാര്‍ രൂപം നല്‍കിയത്. ലഹരി വസ്തുക്കള്‍ മൂലമുള്ള ആരോഗ്യപ്രശ്നങ്ങളെ സംബന്ധിച്ച ബഹുജനപങ്കാളിത്തത്തോടെയുള്ള സമഗ്രബോധവല്‍കരണ പ്രവര്‍ത്തനങ്ങളാണ് ഇതിന്‍റെ ഭാഗമായി സംസ്ഥാനതലത്തില്‍ നടപ്പിലാക്കി വരുന്നത്.
സ്കൂള്‍-കോളേജ് തല ലഹരി വിരുദ്ധ ക്ലബുകള്‍, നാഷണല്‍ സര്‍വീസ് സ്കീം, കുടുംബശ്രീ, സ്റ്റുഡന്റ്‌സ് പൊലീസ് കേഡറ്റ്, സംസ്ഥാന ലൈബ്രറി കൗണ്‍സില്‍, മദ്യവര്‍ജന സമിതികളടക്കമുള്ള സന്നദ്ധ സംഘടനകള്‍, വിദ്യാര്‍ത്ഥി-യുവജന-മഹിളാ സംഘടനകള്‍ എന്നിവയുടെ പങ്കാളിത്തത്തോടെ ലഹരി വിമുക്തകേരളം സാക്ഷാത്കരിക്കുന്നതിനാണ് വിമുക്തി ഊന്നല്‍ നല്‍കുന്നത്.
സ്കൂള്‍-കോളേജ് തലങ്ങളില്‍ ലഹരിവിരുദ്ധ ക്ലബുകള്‍ രൂപീകരിച്ച് വിദ്യാര്‍ത്ഥികള്‍ക്കും യുവജനങ്ങള്‍ക്കുമിടയില്‍ എക്സൈസ് വകുപ്പ് പ്രവര്‍ത്തിച്ചുവരുന്നു. സംസ്ഥാനത്തുടനീളം 3739 സ്കൂള്‍ ലഹരി വിരുദ്ധ ക്ലബുകളും 576 കോളേജ് ലഹരി വിരുദ്ധ ക്ലബുകളും ഇതിനോടകം രൂപീകരിച്ചിട്ടുണ്ട്.
ലഹരിവിമുക്ത പ്രവര്‍ത്തനങ്ങളുടെ ഭാഗമായി എക്സൈസ് വകുപ്പിന്റെ കീഴില്‍ പതിനാലു ജില്ലകളിലും വിമുക്തി ഡിഅഡിക്ഷന്‍ സെന്‍ററുകള്‍ ആരംഭിച്ചിട്ടുണ്ട്. സംസ്ഥാനത്തെ എല്ലാ താലൂക്കുകളിലും വിമുക്തി ഡിഅഡിക്ഷന്‍ ഉപകേന്ദ്രങ്ങള്‍ ആരംഭിക്കുന്നതിനുള്ള നടപടികള്‍ നടന്നുവരുന്നു. തിരുവനന്തപുരം, കൊച്ചി, കോഴിക്കോട് നഗരങ്ങളില്‍ കൗണ്‍സലിങ് സെന്‍ററുകള്‍ പ്രവര്‍ത്തിക്കുന്നുണ്ട്. നേരിട്ടും ഫോണ്‍മുഖേനയും കൗണ്‍സലിങ് തേടാവുന്നതാണ്. കൗണ്‍സലിങ് സെന്റര്‍ ടോള്‍ഫ്രീ നമ്പര്‍: 14405.
വിദ്യാഭ്യാസ മേഖലയിലൂന്നിയ സംസ്ഥാനതല പ്രവര്‍ത്തനങ്ങള്‍ക്കു പുറമേ ലഹരി ഉല്‍പ്പന്നങ്ങളുടെ ലഭ്യതയും വിപണനവും ഇല്ലാതാക്കല്‍, മദ്യം-മയക്കുമരുന്ന് എന്നിവയ്‌ക്ക് അടിമകളായവര്‍ക്ക് ബോധവല്‍ക്കരണം, പുനരധിവാസം, സാമൂഹിക ക്രിയാത്മക ഇടപെടലുകള്‍ എന്നിവയും വിമുക്തിയിലൂടെ വിഭാവനം ചെയ്യുന്നുണ്ട്.
