തൃശൂര്: പൗരത്വ ഭേദഗതി നിയമത്തിനെതിരെ കേരള നിയമസഭയില് മുഖ്യമന്ത്രി അവതരിപ്പിച്ച പ്രമേയം മുഹമ്മദാലി ജിന്നയുടെ 1920ലെ പാക്കിസ്ഥാന് വാദ പ്രമേയത്തിനു തുല്യമെന്ന് ബിജെപി ദേശീയ നിര്വാഹക സമിതിയംഗം പി.കെ. കൃഷ്ണദാസ്. കമ്യൂണിസ്റ്റുകാരും കോണ്ഗ്രസും മുസ്ലിം ലീഗും ചേര്ന്ന് കേരളത്തില് വിഘടനവാദം വളര്ത്തുകയാണെന്നും അദ്ദേഹം മാധ്യമപ്രവര്ത്തകരോട് പറഞ്ഞു.
കേരളത്തെ വേറിട്ട രാജ്യമാക്കി മാറ്റാനാണ് നീക്കം. ഭരണഘടനാവിരുദ്ധവും ഫെഡറലിസത്തിന്റെ കടയ്ക്കല് കത്തിവയ്ക്കുന്നതുമാണ് ഈ നീക്കം. കേരളത്തിലെ ദേശസ്നേഹികള് ഇതിനെതിരെ രംഗത്തുവരണമെന്നും കൃഷ്ണദാസ് പറഞ്ഞു.
വിഭജനകാലത്തെ ഓര്മ്മിപ്പിക്കുന്ന തരത്തില് ദേശീയ വിരുദ്ധ നീക്കങ്ങളാണ് കേരളത്തില് മാര്ക്സിസ്റ്റ് പാര്ട്ടി നടത്തുന്നത്. കേരളത്തിന് പുറത്തുനിന്നുള്ള ഭരണഘടനാ പദവി വഹിക്കുന്ന എല്ലാവരും ഇവിടെ ആക്രമിക്കപ്പെടുകയാണ്. ഗവര്ണര് ആരിഫ് മുഹമ്മദ് ഖാന്, മണിപ്പൂര് ഗവര്ണര് നജ്മ ഹെപ്തുള്ള തുടങ്ങിയവര്ക്കെതിരായ അക്രമങ്ങള് വിഘടനവാദത്തിന്റെ ഭാഗമാണ്.
സ്വാതന്ത്ര്യസമര കാലഘട്ടത്തിലും വിഘടനവാദികള് ദേശീയ നിലപാടുള്ള മുസ്ലിം നേതാക്കളെ ആക്രമിച്ചിട്ടുണ്ട്, കൃഷ്ണദാസ് ചൂണ്ടിക്കാട്ടി. കേരള നിയമസഭ ഇതിനു മുന്പും ദേശവിരുദ്ധ ശക്തികള്ക്കുവേണ്ടി പ്രമേയം പാസാക്കിയിട്ടുണ്ട്.
മുന് ആഭ്യന്തര സഹമന്ത്രിയായ മുല്ലപ്പള്ളി രാമചന്ദ്രന് സിപിഎമ്മിന്റെ ദേശവിരുദ്ധ സമീപനങ്ങളെക്കുറിച്ച് കൃത്യമായ അറിവുള്ളതിനാലാണ് യോജിച്ചുള്ള സമരത്തെ എതിര്ക്കുന്നതെന്നും കൃഷ്ണദാസ് പറഞ്ഞു. ബിജെപി ജില്ലാ നേതാക്കളായ എ. നാഗേഷ്, അഡ്വ.കെ.കെ. അനീഷ്കുമാര്, സുരേന്ദ്രന് ഐനിക്കുന്നത്ത് എന്നിവരും വാര്ത്താസമ്മേളനത്തില് പങ്കെടുത്തു.
