ന്യൂദല്ഹി: പൗരത്വ ഭേദഗതി നിയമം അട്ടിമറിക്കാനുള്ള കേരളം അടക്കം ചില സംസ്ഥാന സര്ക്കാരുകളുടെ നീക്കത്തിന് കനത്ത തിരിച്ചടിയുമായി കേന്ദ്രസര്ക്കാര്. നിയമത്തെ മറികടന്ന് സംസ്ഥാന സര്ക്കാരുകള് പ്രവര്ത്തിക്കാതിരിക്കാന് പുതിയ നിയമം അനുസരിച്ച് പൗരത്വം നല്കുന്നതടക്കം എല്ലാ നടപടികളും കേന്ദ്രസര്ക്കാര് മേല്നോട്ടത്തില് ഓണ്ലൈനായി മാത്രമേ സാധിക്കൂ. ഇതിനുള്ള നടപടി ക്രമങ്ങള് കേന്ദ്രസര്ക്കാര് തലത്തില് ആരംഭിച്ചതായി ഉന്നത വൃത്തങ്ങള് വ്യക്തമാക്കി.
ഇപ്പോള് പൗരത്വത്തിനായ നല്കുന്ന അപേക്ഷകളില് ജില്ല മജിസ്ട്രേറ്റ് വഴിയാണ് മുന്നോട്ടു പോകുന്നത്. എന്നാല്, കേരളനിയമസഭ ഇന്നു നിയമത്തിനെതിരേ പ്രമേയം പാസാക്കിയ പശ്ചാത്തലത്തില് പുതിയ നിയമത്തില് ജില്ലാ മജിസ്ട്രേറ്റിന്റെ അനുമതിയോ നിര്ദേശമോ ഒന്നും ആവശ്യമില്ല. മജിസ്ട്രേറ്റിനു പകരം കേന്ദ്രസര്ക്കാരിന്റെ കീഴിലുള്ള പുതിയ ഉദ്യോഗസ്ഥനെ ഇതിനായി നിയോഗിക്കാനാണ് തീരുമാനം. ഒപ്പം, അപേക്ഷ സമര്പ്പണം, രേഖകളുടെ സമര്പ്പണം, പൗരത്വം നല്കല് എന്നിവയെല്ലാം ഓണ്ലൈനായി മാത്രമേ നടപ്പാകൂ. ഒരുതരത്തിലും പൗരത്വം നല്കുന്നതില് സംസ്ഥാന സര്ക്കാരുകള്ക്ക് ഇടപെടാന് സാധിക്കാത്ത തരത്തിലായിരിക്കും ക്രമീകരണം. യൂണിയന് ലിസ്റ്റില് പെടുന്ന നിയമമായതിനാല് പൗരത്വം നല്കുന്നതിലോ റദ്ദാക്കുന്നതിയോ ഒരു തരത്തിലും സംസ്ഥാന സര്ക്കാരുകള്ക്ക് ഇടപെടാന് സാധിക്കാത്ത തരത്തില് ക്രമീകരണം ഒരുക്കാന് കേന്ദ്ര ആഭ്യന്തരമന്ത്രാലയം നിര്ദേശം നല്കിക്കഴിഞ്ഞു. കേരളം നിയമത്തിനെതിരേ പ്രമേയം പാസാക്കിയ പശ്ചാത്തലത്തില് കൂടിയാണ് ശക്തമായ നടപടികളുമായി കേന്ദ്രസര്ക്കാര് മുന്നോട്ടുപോകുന്നത്.
