കണ്ണൂര്: നുണപ്രചാരണങ്ങള് തിരിച്ചറിയുക വിഘടന വാദികളെ ഒറ്റപ്പെടുത്തുക എന്ന മുദ്രാവാക്യമുയര്ത്തി പൗരത്വ ഭേദഗതി നിയമത്തിന് ഐക്യദാര്ഢ്യം പ്രഖ്യാപിച്ച് എബിവിപി കണ്ണൂരില് സ്വാഭിമാന് റാലി സംഘടിപ്പിച്ചു. സെന്റ് മൈക്കിള്സ് ഗ്രൗണ്ടില് നിന്നാരംഭിച്ച റാലി നഗരം ചുറ്റി കാള്ടെക്സ് ജംഗ്ഷനില് സമാപിച്ചു.
കേരളത്തിലെ ഭരണ-പ്രതിപക്ഷ മുന്നണികള്ക്ക് രാജ്യതാല്പര്യങ്ങളേക്കാള് വലുത് വിഘടനവാദകളെ പ്രീണിപ്പിക്കുന്നതിലാണെന്ന് റാലിയെ അഭിസംബോധന ചെയ്ത് സംസാരിച്ച എബിവിപി ജില്ലാ പ്രസിഡന്റ് ഹേമന്ത് മാവിലാക്കണ്ടി പറഞ്ഞു. ശബരിമല സ്ത്രീപ്രവേശന വഷയവുമായി ബന്ധപ്പെട്ട് കേരളമെമ്പാടും ശക്തമായ പ്രക്ഷോഭം നടന്നിട്ടും പ്രത്യേക നിയമസഭാ സമ്മേളനം വിളിക്കാത്ത കേരളത്തിലെ ഇടത് വലത് മുന്നണികള് ലോക്സഭയും രാജ്യസഭയും പാസ്സാക്കിയ നിയമത്തിനെ എതിര്ക്കാനായി മാത്രം ഒന്നിച്ചത് വിരോധാഭാസമാണെന്നും അദ്ദേഹം പറഞ്ഞു. രാഷ്ട്രീയ നേട്ടം മാത്രമാണ് ഇടതുവലതു മുന്നണികള് ലക്ഷ്യമിടുന്നത്. തുടക്കത്തില് തെറ്റിധാരണകളുടെ പുറത്ത് പ്രതിഷേധസ്വരങ്ങളുയര്ന്ന അസ്സമില് ഇപ്പോള് സമരം പൂര്ണ്ണമായും അവസാനിച്ചു കഴിഞ്ഞുവെന്നും അദ്ദേഹം ചൂണ്ടിക്കാട്ടി.
പൗരത്വ ബില്ലിന് ഐക്യദാര്ഢ്യം പ്രഖ്യാപിച്ച് കൊണ്ട് തിരുവനന്തപുരത്തും കൊച്ചിയിലുമായി വലിയ വിദ്യാര്ഥി പങ്കാളിത്തത്തോടെ റാലികള് സമാനരീതിയില് എബിവിപി സംഘടിപ്പിച്ചിരുന്നു. പൗരത്വ നിയമത്തിന് എതിരെ നടക്കുന്ന ദുര്പ്രചരമങ്ങള് തടയാന് ക്യമ്പസുകള്തോറും ക്യമ്പൈനുകളും എബിവിപി നടത്തിക്കൊണ്ടിരിക്കുകയാണ്.
