നീലേശ്വരം: തൈക്കടപ്പുറം അഴിത്തല ആലിങ്കല് ഭദ്രകാളി ക്ഷേത്ര മഹോത്സവത്തോടനുബന്ധിച്ച് യക്ഷിക്കളത്തിന്റെ ഭാഗമായി നടന്ന അഷ്ടനാഗക്കളം ഭക്തി സാന്ദ്രമായി. നാഗാരാധനയും യക്ഷി കളംപാട്ടും ക്ഷേത്രോത്സവത്തില് പരമപ്രധാനമാണ്.കൂടാതെ ഭസ്മക്കളം, നാഗക്കളം, കരിനാഗയക്ഷി രൂപക്കളം, അഷ്ടനാഗക്കളം എന്നിങ്ങനെ നാല് യക്ഷികളങ്ങളാണ് ക്ഷേത്രസന്നിധിയില് നടത്തപ്പെട്ടത്: വിവാഹം, സന്താന സൗഭാഗ്യം, നാഗ ദോഷപരിഹാരം എന്നിവക്കായി ഭക്തര് ഉത്സവകാലത്ത് യക്ഷിക്കളം വഴിപാടായി സമര്പ്പിക്കാന് എത്തുന്നു.
പച്ചപൊടി, മഞ്ഞള്, സിന്ദൂരം, അരിപൊടി, ഉമിക്കരിപൊടി എന്നീ പഞ്ചവര്ണങ്ങളിലാണ് യക്ഷിക്കളം തയ്യാറാക്കുന്നത്. പുള്ളുവന് സമുദായംഗങ്ങള്ക്കാണ് കളമൊരുക്കലിന്റെ അവകാശം.തൃശൂര് തളികുളത്തെ പുത്തന്വീട്ടില് ഉണ്ണികൃഷ്ണനാണ് നാല് ദിവസങ്ങളില് ഓരോ ഭാവത്തിലുള്ള യക്ഷിക്കളം തയ്യാറാക്കിയത്.ഭാര്യ ഷാനി, മകന് ഉണ്ണികൃഷ്ണന്, മാതാവ് അംബിക, ബന്ധു ദേവയാനി എന്നിവരും യക്ഷികളും വരക്കുന്നതില് സഹായിയായി പ്രവര്ത്തിച്ചു. ദേവി ദര്ശനം ലഭിക്കുന്ന സ്ത്രീകള് വെളിച്ചപാടായി വന്ന് യക്ഷി കളത്തില് അലിഞ്ഞ് ചേര്ന്ന് നാഗത്തെ ആവാഹിച്ചെടുക്കുന്നതോടെ സമാപിക്കും. ഉത്തര മലബാറില് അപൂര്വമായി കാണുന്ന യക്ഷിക്കളം ചടങ്ങ് വീക്ഷിക്കുവാന് ആയിരങ്ങളാണ് ക്ഷേത്രസന്നിധിയില് എത്തി ചേര്ന്നത്. ക്ഷേത്രം തന്ത്രി വര്യന് തരണനെല്ലൂര് പത്മനാഭനുണ്ണി നമ്പൂതിരിപ്പാട് കൊടിയിറക്കിയോടെ എട്ട് ദിവസത്തെ മഹോത്സവം സമാപിച്ചു.
