തിരുവനന്തപുരം: മുഖ്യമന്ത്രി പിണറായി വിജയനെ വിമര്ശിച്ചതിന്റെ പേരില് സിപിഎം പ്രവര്ത്തകര് അയിഷ റെന്നയ്ക്കെതിരെ തിരിഞ്ഞ സംഭവത്തില് വിമര്ശവനവുമായി ദീപാ നിശാന്ത് രംഗത്ത്. ഫെയ്സ്ബുക്കിലൂടെയാണ് അവര് അഭിപ്രായം പങ്കിട്ടത്. ഫാസിസമാണ് അവിടെ നടന്നതെന്ന് ദീപ തുറന്നെഴുതുന്നു. പിണറായി സര്ക്കാരിനെ വിമര്ശിച്ച് അയിഷ റെന്ന സംസാരിച്ചപ്പോള് സ്വന്തം അഭിപ്രായം വീട്ടില് പോയി പറഞ്ഞാ മതിയെന്നായിരുന്നു സിപിഎം പ്രവര്ത്തകരുടെ ആക്രോശം.
ഒരു പൊതുവേദിയില് ക്ഷണിക്കപ്പെട്ട ഒരതിഥി സംസാരിക്കുന്നത് തങ്ങളാഗ്രഹിക്കുന്നതു പോലെയായിരിക്കണമെന്നു പറയുന്നത് ഫാസിസം തന്നെയാണ്. ജനാധിപത്യരാഷ്ട്രത്തില് ആരും വിമര്ശനാതീതരല്ലെന്നും അവര് കുറിച്ചു.
മലപ്പുറം കൊണ്ടോട്ടിയില് പൗരത്വ നിയമത്തിനെതിരെ സംഘടിപ്പിച്ച പ്രതിഷേധ പരിപാടിയില് അയിഷ റെന്ന മുഖ്യാതിഥിയായി എത്തിയപ്പോഴാണ് സംഭവം അരങ്ങേറിയത്. അയിഷ റെന്ന പ്രസംഗിക്കുന്നതിനിടെ കോഴിക്കോട് പൗരത്വ ഭേദഗതി ബില്ലിനെതിരെ പ്രതിഷേധിച്ച അക്രമികളെ അറസ്റ്റുചെയ്തതുമായി ബന്ധപ്പെട്ട മുഖ്യമന്ത്രി പിണറായി വിജയനെ രൂക്ഷമായി വിമര്ശിച്ചിരുന്നു. ഇതോടെ സഖാക്കളെല്ലാം ആസാദി നായികയ്ക്കു നേരെ തിരിയുകയായിരുന്നു. ആള്ക്കൂട്ടത്തിനിടയില് അയിഷ റെന്നയെക്കൊണ്ട് മാപ്പും പറയിപ്പിച്ചു. ഇംഗ്ലീഷില് സംസാരിച്ച അയിഷ റെന്നയോട് മലയാളത്തില് പറഞ്ഞാല് മതി. സ്വന്തം അഭിപ്രായം അങ്ങ് വീട്ടില് പറഞ്ഞാല് മതിയെന്നും അവരോട് പറയുകയായിരുന്നു.
ദീപാ നിശാന്തിന്റെ ഫെയ്സ്ബുക്ക് പോസ്റ്റ്
മതതീവ്രവാദികളോളം അപകടകാരികളായ ആളുകള് വേറെയില്ല എന്നാണ് ബോധ്യം.. പക്ഷേ ഒരു പൊതുവേദിയില് വ്യക്തികള് സംസാരിക്കുന്നത് തങ്ങളാഗ്രഹിക്കുന്നതു പോലെയായിരിക്കണമെന്നു പറയുന്നത് ഫാസിസം തന്നെയാണ്.ഒരു ജനാധിപത്യരാഷ്ട്രത്തില് ആരും വിമര്ശനാതീതരല്ല. അതിപ്പോ മുഖ്യമന്ത്രിയായാലും ശരി പ്രധാനമന്ത്രിയായാലും ശരി.
തര്ക്കങ്ങള്ക്കിടയില് വിഷയം വിടരുത്.
പൗരത്വഭേദഗതിനിയമമാണ് വിഷയം!
അത് മുങ്ങിപ്പോകരുത്..
