തിരുവനന്തപുരം: പൗരത്വനിയമഭേദഗതിയെ പൂര്ണമായി പിന്തുണയ്ക്കുന്നെന്നും പാര്ലമെന്റ് പാസാക്കിയ നിയമത്തോട് യോജിപ്പില്ലെങ്കില് പദവി രാജിവയ്ക്കുമെന്നും കേരളാ ഗവര്ണര് ആരിഫ് മുഹമ്മദ് ഖാന്.
പാര്ലമെന്റ് പാസാക്കിയ നിയമം ഗാന്ധിജി നല്കിയ ഉറപ്പിന്റെ പാലനമാണ്. പ്രതിഷേധക്കാര് വ്യവസ്ഥിതിയിലും ഭരണഘടനയിലും വിശ്വസിക്കണം. ഭരണഘടന സംരക്ഷിക്കുമെന്ന സത്യപ്രതിജ്ഞ പാലിക്കുമെന്നും അദ്ദേഹം പറഞ്ഞു. നിരുത്തരവാദപരമായ പ്രസ്താവനകളോട് പ്രതികരിക്കാനില്ലന്ന് പറഞ്ഞ അദ്ദേഹം നിയമത്തോട് യോജിക്കുന്നുണ്ടെങ്കില് അതിനെ സംരക്ഷിക്കുമെന്നും വ്യക്തമാക്കി.
പൗരത്വനിയമ പ്രതിഷേധത്തില് 15 ദിവസമായി സമരക്കാരുമായി ചര്ച്ചയ്ക്ക് ശ്രമിക്കുകയായിരുന്നു. തുടര്ച്ചയായി പ്രതിഷേധം പ്രകടിപ്പിച്ചതല്ലാതെ ആരും ചര്ച്ചയ്ക്ക് വന്നില്ല. കണ്ണൂരിലെ സംഘര്ഷത്തിന്റെ ഉത്തരവാദിത്തം വൈസ് ചാന്സലര്ക്കാണെന്നും അദ്ദേഹം വിമര്ശിച്ചു.
ചരിത്ര കോണ്ഗ്രസ് ഉദ്ഘാടന ചടങ്ങില് ചട്ടലംഘനമുണ്ടായെന്ന് ഗവര്ണര് ആവര്ത്തിക്കുകയും ചെയ്തു. ഗവര്ണര് പങ്കെടുക്കുന്ന ചടങ്ങ് ഒരുമണിക്കൂറില് കൂടാന് പാടില്ല. കണ്ണൂര് ചടങ്ങില് ആദ്യം ഇര്ഫാന് ഹബീബിന്റെ പേരില്ലായിരുന്നു. അവസാനനിമിഷമാണ് രണ്ട് പേരെ അധികം ഉള്പ്പെടുത്തിയതെന്നും അദ്ദേഹം പറഞ്ഞു.
ഇര്ഫാന് ഹബീബ് സ്വന്തം അഭിപ്രായത്തിനല്ലാതെ മറ്റൊന്നിനും വിലകൊടുക്കില്ല. അലിഗഡില് പഠിക്കുന്ന കാലം മുതല് ഇര്ഫാന് ഹബീബിന്റെ സ്വഭാവം ഇതാണെന്നും അദ്ദേഹം വിമര്ശിച്ചു.
