തിരുവനന്തപുരം: ഇന്ത്യന് ചരിത്ര കോണ്ഗ്രസിന്റെ വേദിയില് ഉദ്ഘാടനപ്രസംഗം തടസ്സപ്പെടുത്തിയ സംഭത്തില് ഗവര്ണര് ചീഫ് സെക്രട്ടറിയെ വിളിച്ചുവരുത്തി. രാജ്ഭവനില് എത്താനാണ് ചീഫ് സെക്രട്ടറി ടോം ജോസിന് ആരിഫ് മുഹമ്മദ് ഖാന് നിര്ദേശം നല്കിയത്. ചടങ്ങില് വലിയ പ്രോട്ടോക്കോള് ലംഘനം നടന്നെന്ന് സമ്മതിച്ച് കണ്ണൂര് വിസി ഗോപിനാഥന് തുറന്ന് സമ്മതിച്ചതോടെ കടുത്ത നടപടികളിലേക്ക് ഗവര്ണര് കടന്നത്.
ഇര്ഫാന് ഹബീബ് പ്രോട്ടോക്കോള് ലംഘിച്ചാണ് ചടങ്ങില് പ്രസംഗിച്ചത് എന്ന കണ്ണൂര് വി.സി മാധ്യമങ്ങളോട് പറഞ്ഞിരുന്നു. ഗവര്ണര്ക്ക് നല്കിയ പട്ടികയില് ഇര്ഫാന് ഹബീബ് പ്രസംഗിക്കുന്ന കാര്യം വ്യക്തമാക്കിയിരുന്നില്ല. പുതിയ അധ്യക്ഷന്റെ പേര് പ്രെപ്പോസ് ചെയ്യാന് രണ്ട് അധ്യാപകര് വന്നത് പ്രോട്ടോക്കോള് ലംഘനമാണെന്നും വി.സി പറഞ്ഞു. അധ്യക്ഷ പ്രസംഗം മുപ്പത് മിനിറ്റ് എന്നത് നാല്പത് മിനിറ്റായി മാറി തുടങ്ങിയ പ്രോട്ടോക്കോള് ലംഘനം നടന്നുവെന്നും വി.സി ഗോപിനാഥന് സമ്മതിച്ചു.
രാജ്ഭവന് കടുത്ത നടപടികളിലേക്ക് നീങ്ങുന്നുവെന്ന് വ്യക്തമായതിന് പിറകെയാണ് വി.സിയുടെ വിശദീകരണം. സംഭവത്തില് വി.സിയെ നേരിട്ട് വിളിപ്പിച്ച് ഗവര്ണര് വിശദീകരണം തേടിയിരുന്നു. വീഡിയൊ ദൃശ്യങ്ങളും പരിശോധിച്ചു. ഗവര്ണറുടെ പ്രസംഗം ഇര്ഫാന് ഹബീബ് തടസ്സപ്പെടുത്തുന്ന ദൃശ്യങ്ങളും, ഗവര്ണറുടെ സെക്യൂരിറ്റി ഉദ്യോഗസ്ഥരെ തള്ളിമാറ്റുന്നതും വീഡിയൊവില് വ്യക്തമായിരുന്നു. ഇത് രാജ്ഭവന് ട്വീറ്റ് ചെയ്യുകയും ചെയ്തു.
ചടങ്ങ് മനപൂര്വ്വം അലങ്കോലമാക്കാനുള്ള ഗൂഡാലോചന നടന്നിരുന്നെന്ന് സൂചന നല്കുന്നതാണ് പ്രോട്ടോക്കോള് ലംഘനമെന്നാണ് സംശയം. ഗവര്ണര്ക്ക് ലഭിച്ച നോട്ടിസില് നിന്ന് ഭിന്നമായി ഇര്ഫാന് ഹബീബ് പ്രസംഗിച്ചതോടെയാണ് ഗവര്ണര്ക്ക് അതിന് മറുപടി നല്കേണ്ട സാഹചര്യം ഉണ്ടായത്. ഗവര്ണറെ വേദിയിലിരുത്തി രാഷ്ട്രപതി ഒപ്പുവച്ച പൗരത്വ ഭേദഗതി നിയമത്തെ പരസ്യമായ തള്ളിപറയുകയും, ഭരണഘടന വെല്ലുവിളി നേരിടുന്നുവെന്ന് ഇര്ഫാന് ഹബീബ് പ്രസംഗിക്കുകയും ചെയ്തതതോടെയാണ് മുമ്പ് തയ്യാറാക്കിയ പ്രസംഗത്തില് നിന്ന് മാറി ഗവര്ണര് ആരിഫ് മുഹമ്മദ് ഖാന് വിശദീകരണം നല്കേണ്ടി വന്നത്. , ഇന്റലിജന്സ് ചുമതലയുള്ള എഡിജിപി എന്നിവരില് നിന്ന് ഗവര്ണര് വിശദീകരണം തേടിയിട്ടുണ്ട്. നോട്ടിസില് പേരില്ലാത്ത ഇര്ഫാന് ഹബീബ് എങ്ങനെ വേദിയിലെത്തി പ്രസംഗിച്ചു, ഇക്കാര്യത്തില് സുരക്ഷ വീഴ്ച ഉണ്ടായിട്ടുണ്ടോ തുടങ്ങിയ കാര്യങ്ങളിലായിരിക്കും ഡിജിപി വിശദീകരണം തേടേണ്ടി വരിക. സംഘാടകരെയും, പ്രതിഷേധക്കാരെയും വെട്ടിലാക്കുന്ന കടുത്ത നടപടികളിലേക്ക് രാജ്ഭവന് നീങ്ങുകയാണെന്നാണ് സൂചന.
