കോഴിക്കോട്: പൗരത്വ ഭേദഗതി നിയമം രാജ്യത്തിന് അനുകൂലമാണെന്ന് ഒരു മുസ്ലിം കൂടിയായ ഗവര്ണര് പറയുന്നത് സഹിക്കാനാവാതെയാണ് നുണപ്രചാരകരായ സിപിഎമ്മും കോണ്ഗ്രസും അദ്ദേഹത്തിനെതിരെ തിരിയുന്നതെന്ന് ബിഎംഎസ് ദേശീയ അധ്യക്ഷന് അഡ്വ.സി.കെ. സജിനാരായണന്. മുസ്ലിം വോട്ട് കിട്ടാന് ഇരുപാര്ട്ടികളും മത്സരിക്കുകയാണ്. ഗവര്ണര് ആരിഫ് മുഹമ്മദ് ഖാന്റെ നിലപാടില് ഇവരുടെ നുണകള് പൊളിയുകയാണ്. കോട്ടൂളി സരസ്വതി വിദ്യാമന്ദിരത്തില് ആര്എസ്എസ് കോഴിക്കോട് മഹാനഗരം പ്രാഥമിക ശിക്ഷാവര്ഗിന്റെ സമാപന പൊതുപരിപാടിയില് മുഖ്യപ്രഭാഷണം നടത്തുകയായിരുന്നു അദ്ദേഹം.
പൗരത്വ നിയമം സംബന്ധിച്ച പ്രശ്നങ്ങള് താത്കാലിക പ്രതിഭാസമാണ്. സത്യം ജനങ്ങള് മനസ്സിലാക്കും. നുണപറഞ്ഞാണ് കമ്മ്യൂണിസ്റ്റുകള് ലോകത്ത് വളര്ന്നിട്ടുള്ളത്. ലോകത്ത് ന്യൂനപക്ഷങ്ങള് പീഡിപ്പിക്കപ്പെടാത്ത ഏക രാഷ്ട്രം ഭാരതമാണ്. പീഡിപ്പിക്കപ്പെട്ടവര്ക്ക് അഭയം നല്കിയ ചരിത്രമാണ് ഭാരതത്തിന്റെത്. 370-ാം വകുപ്പ് റദ്ദ് ചെയ്തതോടെ കശ്മീരിലെ പൊതുസമൂഹം വലിയ പ്രതീക്ഷയിലാണ്. പ്രധാനമന്ത്രി നരേന്ദ്ര മോദിയില് വന് പ്രതീക്ഷയാണ് അവര്ക്കുള്ളത്. വികസനങ്ങള്ക്കായാണ് അവര് കാതോര്ക്കുന്നത്. മുത്തലാഖ് നിരോധിച്ചപ്പോള് മുസ്ലിം സ്ത്രീകള് അതിനെ സ്വീകരിക്കുകയായിരുന്നു. അയോധ്യവിധിയും ഏവരും സ്വാഗതം ചെയ്യുകയായിരുന്നു. ആര്ജ്ജവമുള്ള സര്ക്കാരാണ് രാജ്യം ഭരിക്കുന്നതെന്നും സജി നാരായണന് പറഞ്ഞു.
എന്ഐഎ റിട്ട. എസ്പി ടി.കെ. രാജ്മോഹന് അധ്യക്ഷനായി. വര്ഗ് അധികാരി ടി. പ്രകാശന്, മധുകര് വി. ഗോറെ, വര്ഗ് കാര്യവാഹ് കെ. ജയരാജന് എന്നിവര് സംബന്ധിച്ചു. പഥസഞ്ചലനവും ശാരീരിക് പ്രദര്ശനവും നടന്നു. അരയിടത്ത്പാലത്ത് നിന്ന് ആരംഭിച്ച പഥസഞ്ചലനം സരസ്വതി വിദ്യാമന്ദിരത്തില് സമാപിച്ചു.
