കോഴിക്കോട്: തന്റെ മകന് പുറത്തുണ്ടായിരുന്നുവെങ്കില് പൗരത്വ നിയമ ഭേദഗതിക്കെതിരായ പ്രതിഷേധത്തില് മുന്പന്തിയില് ഉണ്ടാകുമെന്ന് മാവോയിസ്റ്റ് കേസിലെ പ്രതി അലന് ശുഹൈബിന്റെ മാതാവ് സബിതാ മഠത്തില്. യുഎപിഎ നടപ്പിലാക്കില്ല എന്ന് പോളിറ്റ് ബ്യൂറോയില് പറഞ്ഞിട്ടുള്ള ഒരു പാര്ട്ടി എന്തുകൊണ്ട് അതിനെ അനുകൂലിക്കുന്നു എന്നതിന് മുഖ്യമന്ത്രി ഉത്തരം തരണമെന്നും അവര് പറഞ്ഞു. പൗരത്വ ഭേദഗതിക്കെതിരെ ശക്തമായ നിലപാടെടുത്ത മുഖ്യമന്ത്രി യുഎപിഎ കേസില് ഇരട്ടത്താപ്പ് കളിക്കുകയാണ്.
അലന് മാവോയിസ്റ്റാണെന്ന് മുഖ്യമന്ത്രി വരെ പറഞ്ഞിരുന്നു. പക്ഷെ, അവരുടെ കയ്യിലുള്ള തെളിവുകള് അത്രകണ്ട് ബാലിശമാണ്. അതുകൊണ്ടുതന്നെ മുഖ്യമന്ത്രിയോടും സര്ക്കാരിനോടുമുള്ള വിശ്വാസം നഷ്ടപ്പെട്ടു. പാര്ട്ടി പ്രത്യക്ഷത്തില് ഒപ്പമില്ലെങ്കിലും നിരവധി നേതാക്കള് പിന്തുണയുമായി ഒപ്പമുണ്ട്. കേസ് എന്.ഐ.എ ഏറ്റെടുത്തു എന്ന വാര്ത്ത ഞെട്ടിച്ചുവെന്ന് അവര് പറഞ്ഞു. ഞങ്ങള് മതമില്ലാതെയാണ് ജീവിച്ചത്. ഈ ജീവിതം പോലും തെറ്റായിപോയോയെന്ന് സംശയം ഉണ്ട് സബിതാ മഠത്തില് മാധ്യമങ്ങള്ക്ക് നല്കിയ അഭിമുഖത്തില് ചോദിച്ചു.
